പീഡനശ്രമം: പ്രതിക്ക്​ 8 വർഷം കഠിനതടവ്​

തൃശ‍ൂർ

പതിമൂന്നുകാരിയെ തട്ടിക്കൊണ്ടു പോയി പീഡിപ്പിക്കാൻ ശ്രമിച്ച കേസിൽ പ്രതിക്ക്​ 
8 വർഷം കഠിനതടവും പിഴയും ശിക്ഷ. കൊടുങ്ങല്ലൂർ അഴീക്കോട് സുനാമി കോളനി സ്വദേശിയായ തയ്യിൽ സജിലിനെ (23)യാണ്​ തൃശൂർ ഫാസ്റ്റ് ട്രാക്ക് സ്പെഷ്യൽ കോടതി ജഡ്ജ് ആയ ജയ പ്രഭു ശിക്ഷിച്ചത്. 2021 ജനുവരിയിലാണ് സംഭവം. വോളിബോൾ പ്രാക്ടീസിനായി വീട്ടിൽനിന്നിറങ്ങിയ പതിമൂന്നുകാരിയെ പ്രതി വാഹനത്തിൽ കടത്തിക്കൊണ്ടു പോയി അഴീക്കോട് ബീച്ചിലെത്തിച്ച്​ ലൈംഗികമായി പീഡിപ്പിക്കാൻ ശ്രമിച്ചതായാണ്​ കേസ്​. കൊടുങ്ങല്ലൂർ പൊലീസ് രജിസ്റ്റർ ചെയ്ത കേസിൽ പ്രോസിക്യൂഷൻ ഭാഗത്തുനിന്ന്​ 14 സാക്ഷികളെയും 25 രേഖകളും മൂന്ന്​ തൊണ്ടി മുതലുകളും ഹാജരാക്കി. സൈബർ, ഫോറൻസിക് തെളിവുകളും ഹാജരാക്കി. വിവിധ വകുപ്പുകളിലായി പ്രതിക്ക് 8 വർഷം കഠിനതടവും ഒന്നരലക്ഷം രൂപ പിഴയും ശിക്ഷയായി ലഭിച്ചു. പിഴത്തുക മുഴുവൻ ഇരയായ പെൺകുട്ടിക്ക് നൽകാൻ വിധിയിൽ പറയുന്നു. പ്രോസിക്യൂഷനു വേണ്ടി അഡ്വ. ലിജി മധു, അഡ്വ. പി ആർ ശിവ എന്നിവർ ഹാജരായി.