തിങ്കളാഴ്​ചവരെ 
മഴ കനക്കും

തൃശൂർ

കേരളത്തിൽ തിങ്കളാഴ്​ച വരെ ശക്തമായ മഴ തുടർന്നേക്കും. ബംഗാൾ ഉൾക്കടലിൽ രൂപപ്പെട്ട പുതിയ ന്യൂനമർദമാണ്​ ശക്തമായ മഴ തുടരാൻ കാരണം. പസഫിക്​ സമുദ്രത്തിൽ രൂപംകൊണ്ട ചുഴലിക്കാറ്റ്​ ദുർബലമായി വടക്കൻ ബംഗാൾ ഉൾക്കടലിൽ പ്രവേശിച്ച്​ ന്യൂനമർദമായി മാറുമെന്ന്​ കേന്ദ്രകാലാവസ്ഥാ വകുപ്പിന്റെ മുന്നറിയിപ്പിൽ പറഞ്ഞു. ന്യൂനമർദം ശക്തിപ്രാപിച്ച്​ രണ്ടുദിവസത്തിനകം ഒഡിഷ, പശ്​ചിമ ബംഗാൾ തീരത്തേയ്ക്ക്​​ നീങ്ങും. ന്യൂന മർദം കേരള തീരത്തേക്ക്​ അടുക്കുന്നതോടെ മലയോര മേഖലയിൽ ശക്തമായ കാറ്റും മഴയും അനുഭവപ്പെട്ടേക്കും. പ്രതീക്ഷിക്കുന്ന രീതിയിലാണെങ്കിൽ ആദ്യം മധ്യകേരളത്തിലും തെക്കൻ ജില്ലകളിലും തുടർന്ന്​ വടക്കൻ ജില്ലകളിലും ശക്തമായ മഴ ലഭിക്കും. തൃശൂർ ജില്ലയിൽ ഒറ്റപ്പെട്ടയിടങ്ങളിൽ കനത്ത മഴയ്ക്കും മറ്റിടങ്ങളിൽ സാമാന്യ മഴയ്​ക്കും സാധ്യതയുണ്ട്​. ന്യൂനമർദം തുടരുകയാണെങ്കിൽ 31 വരെ നല്ല മഴ ലഭിച്ചേക്കും. ഇ‍ൗ സ‍ീസണിലെ ശക്തമായ മഴദിവസങ്ങളെ അപേക്ഷിച്ച്​ പടിഞ്ഞാറൻ കാറ്റായി വീശി മഴപെയ്യാനാണ്​ സാധ്യത. ഇ‍ൗ സീസണിൽ ഭൂരിഭാഗം ദിവസങ്ങളിലും കാറ്റ്​ വടക്കുപടിഞ്ഞാറൻ ദിശയിലായിരുന്നു. ജൂൺ ഒന്നുമുതൽ ജൂലെ 23 വരെയുള്ള ദിവസങ്ങളിൽ കേരളത്തിൽ 1016.9 മില്ലിമീറ്റർ മഴ ലഭിച്ചു. 11 ശതമാനം മഴക്കുറവാണ്​ രേഖപ്പെടുത്തിയിട്ടുള്ളത്​. ഇ‍ൗ സീസണിൽ 1142 മില്ലിമീറ്റർ മഴയാണ്​ ലഭിക്കേണ്ടത്​. തൃശൂർ ജില്ലയിൽ നാലുശതമാനമാണ്​ മഴക്കുറവ്​. 1227 മില്ലിമീറ്റർ മഴ ലഭിക്കേണ്ടിടത്ത്​ 1180.2 മില്ലി മീറ്റർ മഴയാണ്​ ലഭിച്ചത്​. ഇടുക്കി, വയനാട്​ ജില്ലകളിലാണ്​ സംസ്ഥാനത്ത്​ ഏറ്റവും മഴക്കുറവ്​. മറ്റ്​ ജില്ലകളിൽ ഏതാണ്ട്​ സാധാരണ നിലയിൽ മഴ ലഭിച്ചിട്ടുണ്ട്​. വയനാട്​ 41 ശതമാനവും ഇടുക്കിയിൽ 33 ശതമാനവുമാണ്​ മഴക്കുറവ്​. ലക്ഷദ‍്വീപിൽ 24 ശതമാനം മഴ കുറവാണ്​​.