കേരള സ്​റ്റാർട്ടപ്പ്​ അക്കോറിന്​ 
​ലോകോത്തര അംഗീകാരം

തൃശൂർ

ലോകത്തെ വൻ കമ്പനികൾ പങ്കെടുത്ത്​ ചെന്നൈയിൽ നടന്ന കോസ്മറ്റിക്ക് ഇൻഗ്രേഡിയൻസ് എക്സ്പോയിൽ കേരളത്തിന്റെ യുവസംരഭകരുടെ സ്​റ്റാർട്ടപ്പിന്​ വെള്ളി മെഡൽ. കോസ്മറ്റിക് ഇൻഗ്രേഡിയൻസിന്റെ ഗവേഷണവും ഉൽപ്പാദനവും വിപണനവും നടത്തുന്ന കൊരട്ടി കിൻഫ്രാ പാർക്കിലെ അക്കോർ ഫോർമുലേഷൻസിനാണ്​ ലോകോത്തര അംഗീകാരം ലഭിച്ചത്​. സ‍ൗന്ദര്യവർധക വസ്​തുക്കൾക്കുള്ള മികച്ച ഗവേഷണത്തിനുള്ള സാങ്കേതിക വിദ്യക്കാണ്​ വെള്ളി അവാർഡ്​ അക്കോർ സ്വന്തമാക്കിയത്. വിവിധ രാജ്യങ്ങളിൽ നിന്ന്​ 125 ഗവേഷണങ്ങളാണ്​ ആദ്യം തെരഞ്ഞെടുത്തത്​. പിന്നീട്​ 15 ആക്കി ചുരുക്കി. അതിൽ നിന്നാണ്​ സ്വർണം, വെള്ളി, വെങ്കലം മെഡലുകൾ സമ്മാനിച്ചത്​. ഇതിൽ കേരളത്തിൽ നിന്നുള്ള കമ്പനിക്ക്​ വെള്ളി മെഡൽ നേടാനായത്​ ചരിത്ര നേട്ടമാവുകയാണ്​. അക്കോറിന്റെ സ്ഥാപകൻ ഡോ. ശ്രീരാജ് ഗോപിയുടെ നേതൃത്വത്തിലുള്ള ഗവേഷണ ടീം വികസിപ്പിച്ചെടുത്ത നിയോസോമൽ സാങ്കേതികവിദ്യയാണ് അവാർഡിനർഹമായത്. ഇ‍ൗ സാങ്കേതികവിദ്യവഴി - നിയോസോമുകൾ എന്നറിയപ്പെടുന്ന വെസിക്കുലാർ ഘടനകളെ ഉപയോഗിച്ച് ചർമത്തിൽ സജീവ തന്മാത്രകൾ എത്തിക്കും. ഇത് മെച്ചപ്പെട്ട ആഗിരണം, സൗന്ദര്യവർധക, ചികിത്സാ ഫലങ്ങൾക്ക് മെച്ചപ്പെട്ട സ്ഥിരത തുടങ്ങിയ ഗുണങ്ങൾ നൽകുന്നു. ആന്റിഓക്‌സിഡന്റുകൾ, ആന്റി-ഇൻഫ്ലമേറ്ററി ഏജന്റുകൾ തുടങ്ങിയ വിവിധ സംയുക്തങ്ങളുടെ ഫലപ്രാപ്തി ഈ സംവിധാനം മെച്ചപ്പെടുത്തും. തന്മാത്രകൾ ലയിക്കാനും ചർമത്തിൽ നിലനിർത്താനും ഈ സങ്കേതകവിദ്യ ഗുണകരമാണ്. ഇത് ആന്റി-ഏജിങ്, മോയ്‌സ്ചറൈസേഷൻ, ചർമ അവസ്ഥകൾ ചികിത്സിക്കൽ എന്നിവയുൾപ്പെടെയുള്ള ഉപയോഗങ്ങൾക്ക് വിലപ്പെട്ടതാണെന്ന്​ ഡോ. ശ്രീരാജ്​ ഗോപി പറഞ്ഞു. യൂറോപ്പ്, അമേരിക്ക തുടങ്ങിയ രാജ്യങ്ങളിലെ മൾട്ടിനാഷണൽ കമ്പനികൾ അക്കോറിന്റെ പ്രൊഡക്ടുകളും സാങ്കേതികവിദ്യയും ഉപയോഗിക്കുന്നുണ്ട്. ശ്രീരാജിന്റെ ഭാര്യ ഡോ. അഖിലയാണ് സ്ഥാപനത്തിന്റെ എംഡി.