ടോളില്ലാതെ വണ്ടികൾ ഓടിത്തുടങ്ങി

പാലിയേക്കര

ഹൈക്കോടതി ഉത്തരവിനെ തുടർന്ന് പാലിയേക്കര ടോൾ പ്ലാസയിലെ ടോൾ പിരിവ് നിർത്തി. ബുധനാഴ്ച പകൽ 12 30ന്​ കോടതി ഉത്തരവ് നടപ്പാക്കി. ടോൾ ബൂത്തുകളിലെ ബാരിക്കേഡുകൾ മാറ്റിവെച്ച് വാഹനങ്ങൾ കടത്തിവിട്ടു. ഫാസ്ടാഗ് സംവിധാനം ഓഫ് ചെയ്​തു. ഇതോടെ വാഹനയാത്രക്കാർക്ക്​ ആഹ്​ളാദമായി. രാഷ്​ട്രീയ പാർടി പ്രവർത്തകരും യുവജന സംഘടനാ പ്രവർത്തകരും ടോൾപ്ലാസയിലത്തി വാഹനയാത്രികർക്ക്​ മധുരം വിതരണം ചെയ്​തു. ദേശീയപാതയിലെ ഗതാഗതക്കുരുക്കും അടിപ്പാത നിർമാണവും മൂലം യാത്രക്കാർ ദുരിതമനുഭവിച്ചതിനെ തുടർന്നാണ് ഹൈക്കോടതിയുടെ ഇടക്കാല ഉത്തരവ്. ടോൾ പിരിവ് നിർത്തിവെച്ചതിലൂടെ ആയിരക്കണക്കിന് യാത്രക്കാർക്കാണ് ഗുണകരമായത്.