നിരോധിത വലകൾ ഉപയോഗിച്ച്
മീൻപിടിത്തം:15 ലക്ഷം പിഴ

കൊടുങ്ങല്ലൂർ

നിരോധിത പെലാജിക് വല ഉപയോഗിച്ച് മീൻ പിടിച്ച രണ്ട്‌ കർണാടക ബോട്ടുകൾക്ക് ഫിഷറീസ് വകുപ്പ് 15 ലക്ഷം രൂപ പിഴ ചുമത്തി. മംഗലാപുരം സ്വദേശികളായ മുഹമ്മദ് ഇഫ്ത്തിക്കർ, റിസാന മുഹമ്മദ് ഫിറോസ് എന്നിവരുടെ ഉടമസ്ഥതയിലുള്ള ബോ​ട്ടുകൾക്കാണ്‌ പിഴയിട്ടത്‌. നിരോധിച്ച മൂന്ന് പെലാജിക് വലകൾ ബോട്ടുകളിൽ നിന്ന് പിടിച്ചെടുത്തു. 16 സെ​ന്റീ​മീ​റ്റ​റി​ൽ താഴെയുള്ള 5000 കി​ലോ അരണ മീനും പിടിച്ചെടുത്തു. അഴീക്കോട് ലൈറ്റ് ഹൗസ് പടിഞ്ഞാറ് ഭാഗത്ത് നിന്ന് പരമ്പരാഗത മത്സ്യത്തൊഴിലാളികളാണ് ബോട്ടുകളെ തടഞ്ഞ് വച്ച് ഫി​ഷ​റീ​സ് മ​റൈ​ൻ എ​ൻ​ഫോ​ഴ്സ്മെന്റ്‌, കോസ്റ്റൽ പൊലീസ് ഉ​ദ്യോ​ഗ​സ്ഥ​രെ വിവരമറിയിച്ചത്. ഉദ്യേഗസ്ഥസംഘം രണ്ട് പട്രോളിങ് ബോട്ടുകളിലെത്തി കസ്റ്റഡിയിലെടുക്കുകയായിരുന്നു. ഇതര സംസ്ഥാന മത്സ്യബന്ധന യാനങ്ങൾക്ക് കേരള തീരത്ത് 12 നോട്ടിക്കൽ മൈലിനുള്ളിൽ മീൻപിടിത്തം നടത്താനുള്ള സ്പെഷ്യൽ പെർമിറ്റ് ഈ ബോട്ടുകൾക്ക് ഉണ്ടായിരുന്നില്ലെന്ന്‌ ഫിഷറീസ് എക്സ്റ്റഷൻ ഓഫീസർ സി കെ മനോജിന്റെ നേതൃത്വത്തിൽ നടത്തിയ പരിശോധനയിൽ കണ്ടെത്തി. ബോട്ടുകളിൽ നിന്ന്‌ കണ്ടുകെട്ടിയ ചെ​റു​മ​ത്സ്യ​ങ്ങ​ളെ പു​റം​ക​ട​ലി​ൽ ഒ​ഴു​ക്കി ക​ള​ഞ്ഞു. അ​ഴീ​ക്കോ​ട് ഫി​ഷ​റീ​സ് സ്റ്റേ​ഷ​ൻ അ​സി​സ്റ്റ​ന്റ്‌ ഡ​യ​റ​ക്ട​ർ കെ പി ഗ്രേസി ന​ൽകിയ പ്ര​ത്യേ​ക അന്വേഷണ റിപ്പോർട്ടിൽ ജില്ലാ ഫി​ഷ​റീ​സ് ഡെ​പ്യൂ​ട്ടി ഡ​യ​റ​ക്ടറാണ് നടപടി സ്വീകരിച്ചത്. ബോട്ടുകളിൽ നിന്ന്‌ കണ്ട് കെട്ടിയ ഉപയോഗയോഗ്യമായ മീനുകൾ അഴീക്കോട് ഫിഷ് ലാന്റിങ് സെന്ററിൽ പരസ്യ ലേലം ചെയ്ത് കിട്ടിയ 6,60,450 രൂപ ട്രഷറിയിൽ അടച്ചു. ആദ്യമായാണ് ഇത്രയും വലിയ തുക പിഴയിനത്തിൽ ഫിഷറീസ് വകുപ്പ് ഇടാക്കുന്നത്.