ഓർമകളുമായി ഉറ്റവരെത്തും

മൂന്നാർ

നാടിനെ നടുക്കിയ പെട്ടിമുടി ദുരന്തത്തിൽ മരിച്ചവരെ മറവുചെയ്ത രാജമലയിൽ കണ്ണീർ ഓർമകളുമായി ബുധനാഴ്ച ഉറ്റവരും സുഹൃത്തുക്കളും ബന്ധുക്കളുമെത്തും. നാടിനെയാകെ നടുക്കിയ പെട്ടിമുടിയിലുണ്ടായ ഉരുൾ പൊട്ടൽ 2020 ആഗസ്​ത്​ ആറിനാണ്​. മലയിടിഞ്ഞിറങ്ങിയ ദുരന്തത്തിൽ 70 ജീവനുകളാണ് പൊലിഞ്ഞത്. ഇതിൽ 66 പേരുടെ മൃതശരീരങ്ങൾ കണ്ടെടുത്തിരുന്നു. രാജമലയ്ക്ക് സമീപം പ്രത്യേകം തയാറാക്കിയ സ്ഥലത്ത്​ നിരയായാണ് മൃതദേഹങ്ങൾ സംസ്​ക്കരിച്ചിട്ടുള്ളത്. എസ്റ്ററ്റുകളിൽനിന്നും തമിഴ് നാട്ടിൽനിന്നും ബന്ധുക്കൾ എത്തി കർമങ്ങൾ നടത്തും. കണ്ണൻ ദേവൻ കമ്പനി അധികൃതരും ഉദ്യോഗസ്ഥരും കല്ലറയിൽ പുഷ്പാർച്ചന നടത്തും. വിവിധ മത മേലധ്യക്ഷന്മാരുടെ നേതൃത്വത്തിൽ സർവമത പ്രാർഥനയും നടത്തും. ദുരന്തത്തിന്​ അഞ്ചുവർഷം പിന്നിടുകയാണ്. മൂന്നാറിലെ പൊതുപ്രവർത്തകരും ചടങ്ങുകളിൽ പങ്കെടുക്കും.