തൃകൈകുത്ത്‌ പാലം സജ്ജം

നിലമ്പൂർ

കുതിരപ്പുഴ ഇനി എളുപ്പത്തിൽ കടക്കാം. വണ്ടൂരിനെയും നിലമ്പൂരിനെയും ബന്ധിപ്പിക്കുന്ന തൃകൈകുത്ത്‌ പാലം ഉദ്‌ഘാടനത്തിന്‌ ഒരുങ്ങി. 23ന്‌ പകല്‍ 3.30ന് പൊതുമരാമത്ത് മന്ത്രി പി എ മുഹമ്മദ് റിയാസ് ഉദ്‌ഘാടനംചെയ്യും.

നാട്ടുകാരുടെ ആവശ്യപ്രകാരം വണ്ടൂർ മുൻ എംഎൽഎ എൻ കണ്ണനായിരുന്നു പാലത്തിനായി ആദ്യം പ്രയത്നിച്ചത്. 2016ൽ എൽഡിഎഫ് സർക്കാർ ഭരണത്തിലെത്തിയശേഷം 2019–-- 20 ബജറ്റിൽ 10.90 കോടി രൂപയാണ്‌ പാലത്തിനായി അനുവദിച്ചത്‌. 2021ലാണ്‌ പാലത്തിന്റെ നിർമാണം തുടങ്ങിയത്‌. 26 മീറ്ററുകളുള്ള അഞ്ച് സ്പാനകളോടുകൂടി 129.74 മീറ്റർ നീളത്തിലാണ്‌ പാലം പ്രവൃത്തി പൂർത്തീകരിച്ചത്‌. 7.5 മീറ്റർ വീതിയിൽ ടാറിങ്ങും ഇരുവശങ്ങളിലും 1.5 മീറ്റർ നടപ്പാതയുമുണ്ട്. പൊതുമരാമത്ത് പാലക്കാട് പാലം ഡിവിഷനായിരുന്നു നിർമാണ ചുമതല.

മമ്പാട് പഞ്ചായത്തിലെ വള്ളിക്കെട്ട്, തൃക്കൈകുത്ത്, വണ്ടൂർ പഞ്ചായത്തിലെ കാപ്പിൽ, കാഞ്ഞിരംപാടം പ്രദേശങ്ങളിലുള്ളവർ നിലമ്പൂർ എത്താൻ പുളിക്കലോടിവഴി 10 കി.മീ ചുറ്റിയാണ്‌ സഞ്ചരിച്ചിരുന്നത്‌. പാലം വരുന്നതോടെ ദൂരം രണ്ടര കിലോമീറ്ററായി ചുരുങ്ങും.