അപകടഭീഷണി 
ഉയർത്തി പാഴ്​മരങ്ങൾ

മാന്നാർ

മാവേലിക്കര –മാന്നാർ സംസ്ഥാന പാതയ്​ക്കിരുവശവും അപകടഭീഷണിയായി പാഴ്​മരങ്ങൾ. കുരട്ടിക്കാട് വനിതാ ഹോസ്​റ്റൽ പ്രവർത്തിക്കുന്ന തിരുവിതാംകൂർ ദേവസ്വം ബോർഡിന്റെ വസ്​തുവിലെ മാവിൻശിഖരം 11 കെവി ലൈനിൽ തങ്ങിനിൽക്കുന്നു. തടിയുടെ ഭാരം താങ്ങാനാകാതെ കമ്പി പൊട്ടിവീഴാം. ഹോസ്​റ്റലിന് കിഴക്കുവശത്തെ റോഡിലൂടെ സ്​കൂൾ കുട്ടികളും കാൽനടക്കാരും വാഹനങ്ങളും പോകുന്നുണ്ട്​. തിരക്കേറിയ പൊതുമരാമത്ത് റോഡുകളിലാണ് നിലംപൊത്താറായ പാഴ്​മരങ്ങൾ അധികവും. ചെന്നിത്തല പുത്തുവിളപ്പടി സെന്റ്​ ജോർജ് മലങ്കര സിറിയൻ കത്തോലിക്ക ചർച്ചിന്​ സമീപം റോഡരികിലായി ചാഞ്ഞുനിൽക്കുന്ന മരം ഏതുനിമിഷവും നിലംപൊത്താം. കുരിശുംമൂട്, കൊയിക്കൽമുക്ക്, ഊട്ടുപറമ്പ്, നായർസമാജം സ്​കൂൾ ജങ്ഷൻ, കുറ്റിമുക്ക് എന്നിവിടങ്ങളിൽ അപകടകരമായ പാഴ്​മരങ്ങളുണ്ട്​. പോസ്​റ്റ്​ ഓഫീസ്, ഹോമിയോ ആശുപത്രി, ദേശസാൽകൃത ബാങ്ക്, അക്ഷയകേന്ദ്രം, വ്യാപാരസ്ഥാപനങ്ങൾ ഒക്കെ പ്രവർത്തിക്കുന്നിടത്താണ്​ ഇവ. കച്ചവട സ്ഥാപനങ്ങൾക്കും ഭീഷണിയാണ്.