തോർച്ചയില്ലാതെ ദുരിതം

ആലപ്പുഴ

കാലവർഷത്തിലെ പെരുമഴപ്പെയ്​ത്തിൽ വീണ്ടും ദുരിതത്തിലായി ജില്ല. കിഴക്കൻവള്ളത്തിന്റെ വരവോടെ കുട്ടനാട്ടിലെ താഴ്​ന്നപ്രദേശങ്ങൾ വെള്ളക്കെട്ടിലായി. മുട്ടാർ, തലവടി, രാമങ്കരി, കാവാലം, വെളിയനാട്​ പഞ്ചായത്തുകളിലെ വിവിധ ഭാഗങ്ങൾ മുങ്ങി. പുളിങ്കുന്ന്​ പഞ്ചായത്തിലെ 11 മുതൽ 16 വരെ വാർഡുകൾ വെള്ളക്കെട്ടിലാണ്​. മുട്ടാർ, കിടങ്ങറ, തായങ്കരി, -എടത്വ മേഖലകളിലേക്കുള്ള കെഎസ്ആർടിസി ബസ് സർവീസ് നിർത്തിവച്ചു. ആറാട്ടുപുഴ പെരുമ്പള്ളിയിൽ ശക്​തമായ കടലേറ്റവുമുണ്ടായി. കാറ്റിൽ മരംവീണും ശിഖരങ്ങൾ പൊട്ടിവീണും അപകടങ്ങളുണ്ടാകുന്നത്​ ജനങ്ങളെ ഭീതിയിലാഴ്​ത്തി. മാന്നാർ തൃപ്പെരുന്തറയിൽ വെട്ടത്തുവിള ഗവ. എൽപി സ്​കൂളിന്റെ ചുറ്റുമതിലിടിഞ്ഞുവീണു. മണിമല, പമ്പ, അച്ചൻകോവിലാറുകളും കൈവഴികളും നിറഞ്ഞുകവിഞ്ഞു.