കോടതിപ്പാലത്ത് ഗതാഗത നിയന്ത്രണം ട്രയൽ റൺ ആരംഭിച്ചു

ആലപ്പുഴ

കോടതിപ്പാലം പുനർനിർമാണത്തിനുള്ള ഗതാഗതപരിഷ്​കാരത്തിന്റെ ഭാഗമായി ട്രയൽറൺ ആരംഭിച്ചു. പുതിയ ക്രമീകരണങ്ങളെക്കുറിച്ച്​ അറിയാത്തതിനാൽ രാവിലെ നഗരത്തിൽ എത്തിയവർക്ക്​ ആശയക്കുഴപ്പമുണ്ടായി. ഇതിനാൽ രാവിലെ കുറച്ചുനേരം ഗതാഗതക്കുരുക്ക്​ നേരിട്ടെങ്കിലും 10.30 ഓടെ സാധാരണരീതിയിലായി. വാടക്കനാലിന്റെ തെക്കേക്കരയിലെ റോഡിനൊപ്പം മുല്ലയ്​ക്കൽ കോടതിപ്പാലം റോഡും പാലവും അടച്ചു. ഗതാഗതക്രമീകരണം പരിശോധിക്കുകയാണെന്നും വലിയ പ്രശ്​നങ്ങളൊന്നും ഉണ്ടായിട്ടില്ലെന്നും ട്രാഫിക്​ പൊലീസ്​ അറിയിച്ചു. ആലപ്പുഴ സിറ്റി ട്രാഫിക്കിലെയും പൊലീസിലെയും ഏഴുപതിലേറെ ഉദ്യോഗസ്ഥരാണ്​ ആദ്യദിനം ഗതാഗതം നിയന്ത്രിച്ചത്​. ഇനിയുള്ള ദിവസങ്ങളിൽ നിയന്ത്രണത്തിന്​ വാർഡൻമാരെ നിയോഗിക്കും​. തുടർന്നുള്ള ദിവസങ്ങളിലും രാവിലെ മാത്രം ചെറിയ രീതിയിൽ ഗതാഗതക്കുരുക്ക് ഉണ്ടാകുമെന്നാണ്​ കരുതുന്നത്​. മറ്റ്​ പ്രശ്​നങ്ങൾ ഉണ്ടാകാത്തതിനാൽ നിലവിലെ സംവിധാനം തുടരുമെന്ന്​ ട്രാഫിക്​ പൊലീസ്​ അറിയിച്ചു. വൈദ്യുതി വിളക്കുകൾ ആവശ്യമുള്ള ചില പ്രദേശങ്ങളിൽ അത്​ സ്ഥാപിക്കാനുള്ള നിർദേശം നൽകി​. ഗതാഗതസംവിധാനം സ്ഥിരമാക്കിയശേഷമാകും പാലം പൊളിക്കുന്നത്​. പാലത്തിന്റെ പടിഞ്ഞാറുഭാഗത്തെ ജലകന്യക ശിൽപ്പം മാറ്റിസ്ഥാപിക്കുന്നതിന്റെ ജോലികൾ നടക്കുകയാണ്​.