വിദ്യാർഥികൾക്ക്​ കഞ്ചാവ്​ നൽകിയവർ പിടിയിൽ

ചേർത്തല

സ്​കൂൾ കേന്ദ്രീകരിച്ച് വിദ്യാർഥികൾക്ക് കഞ്ചാവ് നൽകിയ രണ്ടുപേരെ പൂച്ചാക്കൽ പൊലീസ്​ പിടികൂടി. രക്ഷിതാക്കളുടെ അവസരോചിത ഇടപെടലിലാണ്​ കുറ്റകൃത്യം വെളിപ്പെട്ടതും പ്രതികളെ പിടികൂടാനായതും. പാണാവള്ളി പഞ്ചായത്ത് 12–ാംവാർഡിൽ പൂച്ചാക്കൽ കുളങ്ങരവെളി ആദിത്യൻ, 14–ാംവാർഡിൽ അടിച്ചീനികർത്തിൽ അഭിജിത്ത് എന്നിവരാണ്​ പിടിയിലായത്​. ഞായറാഴ്​ച പൂച്ചാക്കൽ, തളിയാപറമ്പ് ഭാഗങ്ങളിൽനിന്നാണ്​ ഇവരെ കസ്​റ്റഡിയിലെടുത്തത്​. ശക്തിമൂർത്തി അമ്പലത്തിനടുത്ത്​ കടവിലാണ്​ പലദിവസങ്ങളിൽ കുട്ടികൾക്ക്​ കഞ്ചാവ് നൽകി വലിപ്പിച്ചത്​. കഞ്ചാവ് ഉപയോഗിച്ച വിദ്യാർഥികളുടെ പെരുമാറ്റത്തിൽ രക്ഷിതാക്കൾക്ക് സംശയം തോന്നി ചോദിച്ചപ്പോഴാണ്​ കഞ്ചാവ് ഉപയോഗം വെളിപ്പെട്ടത്. തുടർന്ന്​ രക്ഷിതാക്കൾ പൂച്ചാക്കൽ പൊലീസിനെ സംഭവം അറിയിക്കുകയായിരുന്നു. പൂച്ചാക്കൽ എസ്​എച്ച്​ഒ പി എസ്​ സുബ്രഹ്മണ്യന്റെ നേതൃത്വത്തിൽ എസ്‌ഐമാരായ ജെ സണ്ണി, ജി എസ്​ ദീപു, സുനിൽരാജ്, എസ്​സിപിഒ സേവ്യർ, സിപിഒമാരായ കലേഷ്, ജോബി കുര്യാക്കോസ്, കിങ് റിച്ചാർഡ്, അനൂപ് എന്നിവരാണ് പ്രതികളെ പിടികൂടിയത്. പ്രതികളെ കോടതി റിമാൻഡ്ചെയ്​തു. സ്​കൂൾ പ്രൊട്ടക്ഷൻ ഗ്രൂപ്പിലൂടെ നിരീക്ഷിച്ച്​ ലഹരി ഉപയോഗിക്കുന്ന കുട്ടികളെ കണ്ടെത്തി കൗൺസലിങ്ങും ചികിത്സയും നൽകുന്നതോടൊപ്പം ലഹരിവസ്​തു നൽകുന്നവരെ കണ്ടെത്തി നിയമനടപടി സ്വീകരിക്കുമെന്നും എസ്​എച്ച്​ഒ പി എസ്​ സുബ്രഹ്മണ്യൻ പറഞ്ഞു.