അച്ചൻകോവിലാറ്റിൽ മുങ്ങിമരിച്ചവർക്ക്‌ 
നാടിന്റെ അന്ത്യാഞ്ജലി

മാവേലിക്കര, ഹരിപ്പാട്​

അച്ചൻകോവിലാറ്റിൽ മുങ്ങിമരിച്ചവരുടെ മൃതദേഹം സംസ്‌ക്കരിച്ചു. മാവേലിക്കര കല്ലുമല അക്ഷയ് ഭവനത്തിൽ രാഘവ് കാർത്തിക്കിന്റെ (24)യും തൃക്കുന്നപ്പുഴ കിഴക്കേക്കര വടക്ക് ബിനുഭവനത്തിൽ ബിനു (42) വിന്റെയും സംസ്​കാരം വൻ ജനാവലിയുടെ സാന്നിധ്യത്തിൽ നടന്നു. രാഘവ് കാർത്തിക്കിന്റെ ചിതയ്‌ക്ക്‌ ഇളയ സഹോദരൻ അദ്വൈത് കാർത്തിക്ക് തീ കൊളുത്തി. കാർത്തികേയന്റെയും ഗീതയുടെയും മകനാണ്​ രാഘവ് കാർത്തിക്ക്​. പകൽ മൂന്നോടെയാണ്​ രാഘവിന്റെ മൃതദേഹം വീട്ടിലെത്തിച്ചത്​. സിപിഐ എം ജില്ലാ സെക്രട്ടറിയറ്റ് അംഗം ജി ഹരിശങ്കർ, ജില്ലാ കമ്മിറ്റിയംഗങ്ങളായ മുരളി തഴക്കര, കെ മധുസൂദനൻ, എം എസ് അരുൺകുമാർ എംഎൽഎ, ഏരിയ സെക്രട്ടറി ജി അജയകുമാർ, തെക്കേക്കര പഞ്ചായത്ത് പ്രസിഡന്റ്​ ഡോ. കെ മോഹൻകുമാർ, കേരള കോൺഗ്രസ് യൂത്ത് ഫ്രണ്ട് എം സംസ്ഥാന വൈസ് പ്രസിഡന്റ്​ എസ് അയ്യപ്പൻപിള്ള തുടങ്ങിയവർ അന്തിമോപചാരമർപ്പിച്ചു. ബിനുവിന്റെ മൃതദേഹം വണ്ടാനം മെഡിക്കൽ കോളേജ് ആശുപത്രിയിൽ പോസ്​റ്റുമോർട്ടത്തിനുശേഷം വൈകീട്ട്‌ വീട്ടിലെത്തിച്ചു. അഞ്ചോടെ വീട്ടുവളപ്പിൽ സംസ്​കാരം നടത്തി തിങ്കൾ പകൽ 1.15നായിരുന്നു അപകടം. അച്ചൻകോവിലാറ്റിന്​ കുറുകെയുള്ള കീച്ചേരി കടവ് പാലത്തിന്റെ നിർമാണത്തിനിടെയാണ്​ അപകടം. കോൺക്രീറ്റ് നടക്കുന്നതിനിടെ ലോഹത്തട്ടിന്റെ നട്ട് പൊട്ടി. മറ്റൊരു നട്ട് ഘടിപ്പിക്കുന്നതിനിടെ തട്ട് തകർന്ന് കോൺക്രീറ്റ് ഉൾപ്പെടെ ആറ്റിൽ പതിക്കുകയായിരുന്നു. ആറ്റിൽ വീണവരിൽ അഞ്ചുപേരും നീന്തിക്കയറി. രാഘവും ബിനുവും ഒഴുക്കിൽപ്പെട്ടു.