മുഹമ്മയിൽ ഗാനാഞ്​ജലിയും 
പുഷ്​പാർച്ചനയും

മുഹമ്മ

കുമരകം ബോട്ട് ദുരന്തത്തിൽ ജീവൻ പൊലിഞ്ഞവർക്ക് മുഹമ്മ ഗ്രാമം ഓർമപ്പൂക്കൾ അർപ്പിച്ചു. 23–ാമത്​ അനുസ്​മരണദിനത്തിൽ ഡിവൈഎഫ്​ഐ ഉൾപ്പെടെ വിവിധ സംഘടനകളുടെ നേതൃത്വത്തിൽ മുഹമ്മ ബോട്ട് ജെട്ടിയിൽ പുഷ്​പാർച്ചനയും അനുസ്​മരണയോഗവും സംഘടിപ്പിച്ചു. 2002 ജൂലൈ 27ന് രാവിലെ മുഹമ്മയിൽനിന്ന്​ കുമരകത്തേക്ക് പോയ ജലഗതാഗതവകുപ്പിന്റെ എസ് 53 നമ്പർ ബോട്ടാണ് വേമ്പനാട്ടുകായലിൽ അപകടത്തിൽപ്പെട്ട് പിഞ്ചുകുഞ്ഞടക്കം 29 പേർ മരിച്ചത്. ഡിവൈഎഫ്ഐ മേഖലാ കമ്മിറ്റി സംഘടിപ്പിച്ച അനുസ്​മരണ യോഗത്തിൽ അശ്വിൻ ബിജു അധ്യക്ഷനായി. കയർ കോർപറേഷൻ ചെയർമാൻ ജി വേണുഗോപാൽ, ബ്ലോക്ക് പ്രസിഡന്റ്​ അരുൺ പ്രശാന്ത്, മേഖലാ സെക്രട്ടറി വി വിഷ്​ണു, അരുൺ ബാബു, റിൻഷാദ്, അരുൺകുമാർ, വിപിൻദാസ്, അശ്വതി, കെ പി വിഷ്​ണു, ജീവൻ ദാസ്‌ എന്നിവർ സംസാരിച്ചു. അരങ്ങ് സോഷ്യൽ സർവീസ് ഫോറം ദീപം തെളിച്ച് അനുസ്​മരണ ഗാനവുമായി പുഷ്​പാർച്ചന നടത്തി. അരങ്ങ് രക്ഷാധികാരി സി പി ഷാജി അധ്യക്ഷനായി. ജീമോൻ മുഹമ്മ എഴുതി ആലപ്പി ഋഷികേശ് സംഗീതം നൽകിയ അനുസ്​മരണ ഗാനം ദേവിക സുരേഷ്​കുമാറും അനന്യ പി അനിലും ചേർന്ന് ആലപിച്ചു. പഞ്ചായത്ത് പ്രസിഡന്റ് സ്വപ്​ന ഷാബു, പി എസ് സന്തോഷ്​കുമാർ, സി കെ മണി ചീരപ്പൻചിറ, ബേബി തോമസ്, ചന്ദ്രൻ കറുകക്കളം, വിജയകുമാർ, പ്രകാശൻ തണ്ണീർമുക്കം, സി വി വിദ്യാസാഗർ, വിജു ദാസൻ, ടോമിച്ചൻ കണ്ണയിൽ എന്നിവർ സംസാരിച്ചു.