ഇനി പുതിയപാലം, പുതുചരിത്രം

ആലപ്പുഴ

ആലപ്പുഴയുടെ ഗതാഗത സൗകര്യത്തിൽ പതിറ്റാണ്ടുകളോളം പ്രധാനപങ്കു വഹിച്ചിരുന്ന ജില്ലാ കോടതിപ്പാലം ചരിത്രത്തിലേക്ക്​. കാലാനുസൃതമായി അധികസൗകര്യത്തോടെ പുതിയ പാലം നിർമിക്കുന്നതിനായി പഴയത്​ പൊളിച്ചുതുടങ്ങി. ചൊവ്വ രാവിലെ പാലത്തിലെ ടാറിങ്​ ആദ്യം നീക്കി​. തുടർന്ന്​ കൈവരികൾ പൊളിച്ചു. മൂന്നുദിവസത്തിനുള്ളിൽ പൂർണമായി പൊളിച്ചുനീക്കും. പാലത്തിനോട്​ ചേർന്നുള്ള വൈദ്യുതി ലൈനും ജലവിതരണ പൈപ്പുകളും മാറ്റൽ പുരോഗമിക്കുന്നു​. നിർമാണ ചുമതലയുള്ള ചെറിയാൻ വർക്കി കൺസ്​ട്രക്​ഷൻസ്​ കൂടുതൽ യന്ത്രങ്ങളും ജോലിക്കാരെയും എത്തിച്ചു. സമീപത്തെ മത്സ്യകന്യക ശിൽപം മാറ്റുന്നതിൽ ഉടൻ തീരുമാനം ഉണ്ടാകും. പൊളിക്കുന്നതിന്​ മുന്നോടിയായി പാലത്തിലൂടെയുള്ള ഗതാഗതം പൂർണമായും നിരോധിച്ചിരുന്നു​. നഗരത്തിലും ഗതാഗതക്രമീകരണം ഏർപ്പെടുത്തി. ആലപ്പുഴ, അമ്പലപ്പുഴ നിയമസഭാ മണ്ഡലങ്ങളെ വേർതിരിക്കുന്ന വാടക്കനാലിന് കുറുകെയാണ് ‘റ‍ൗണ്ട്​ ടേബിൾ’ മാതൃകയിൽ പുതിയ പാലം നിര്‍മിക്കുന്നത്. ഇത്​ നഗരത്തിലെ ഗതാഗതക്കുരുക്കിന് പരിഹാരമാകും. നഗരസ‍ൗന്ദര്യവൽക്കരണത്തിലും പാലം നിർണായകമാവും. 120.52 കോടിയാണ്​ പദ്ധതിച്ചെലവ്​. കനാലിന്റെ ഇരുകരകളിലും മൂന്ന് വരി വീതം ഗതാഗത സ‍ൗകര്യമുണ്ടാകും. 5.5 മീറ്റർ വീതിയിൽ മേൽപ്പാലങ്ങളും 7.5 മീറ്റർ വീതിയിൽ അടിപ്പാതയും പുറത്ത്​ 5.5 മീറ്റർ വീതിയിൽ റാമ്പുകളുമുണ്ടാകും. ഫ്ലൈ ഓവറുകളിലും റാമ്പുകളിലും ഓരോ ദിശയിലേക്കാവും ഗതാഗതം. അടിപ്പാത വഴി ഇരുഭാഗങ്ങളിലേക്കും ഗതാഗതമുണ്ടാകും.