24 മണിക്കൂറിനിടെ 
കരകയറ്റിയത്​ 27 ജീവൻ

ആലപ്പുഴ

യന്ത്രത്തകരാറിനെത്തുടർന്ന്​ കടലിൽ ഒഴുകിനടന്ന രണ്ട്​ ബോട്ട്​ തീരത്തെത്തിച്ച്​ 24​ മണിക്കൂറിനിടെ ഫിഷറീസ്​ രക്ഷാസേന കാത്തത്​ 27 ജീവൻ. ആലപ്പുഴ സ്വദേശികളുടെ ഹരേരാമ-ാ–രണ്ട്​, സികെഎഫ് ബോട്ടുകളിലെ 20 തൊഴിലാളികളെയും കൊല്ലം നീണ്ടകര സ്വദേശിയുടെ മരിയ അന്നൈ ബോട്ടിലെ ഏഴ്​ തൊഴിലാളികളെയുമാണ്​ പ്രക്ഷുബ്​ധമായ കടലിനോടും കാറ്റിനോടും പൊരുതി രണ്ട്​ ദിവസം നീണ്ട പരിശ്രമത്തിലൂടെ രക്ഷിച്ച്​ തീരത്തെത്തിച്ചത്​. അപകട സന്ദേശമെത്തിയതുമുതൽ തോട്ടപ്പള്ളി ഫിഷറീസ് സ്​റ്റേഷൻ ഉഷാറായി​. ആറാട്ടുപുഴ എൻടിപിസിയുടെ പടിഞ്ഞാറ്​ ‘ഹരേ രാമാ’ ബോട്ട് എൻജിൻ തകരാറിലായതായി വിവരംലഭിക്കുന്നത്​ ശനി രാവിലെ 7.30നാണ്​. രക്ഷാപ്രവർത്തനം വൈകിട്ട്​ അഞ്ചിന്​ പൂർത്തിയായി. ആലപ്പാട് പടിഞ്ഞാറ്​ സികെഎഫ് ബോട്ടിന്റെ പ്രൊപ്പല്ലറിൽ വലചുറ്റി പ്രവർത്തനംനിലച്ചു. വൈകിട്ട്​ 6.50ന്​ തുടങ്ങിയ രക്ഷപ്രവർത്തനം ഞായർ പുലർച്ചെ നാലിന്​ പൂർത്തിയായി. കായംകുളം ഹാർബറിൽനിന്ന് പുറപ്പെട്ട രക്ഷാബോട്ട് തകരാറിലായ രണ്ടുബോട്ടും കെട്ടിവലിച്ച്​ എത്തിച്ചു. തൃക്കുന്നപ്പുഴ തീരത്തുനിന്ന്​ പടിഞ്ഞാറുമാറി ഏഴ്​ തൊഴിലാളികളുമായി മീൻപിടിക്കുകയായിരുന്ന മരിയ അന്നൈ ബോട്ട്​ വെള്ളംകയറി മുങ്ങുകയായിരുന്നു. പ്രതികൂല കാലാവസ്ഥയിലും രക്ഷാപ്രവർത്തനം ആരംഭിച്ചു. ശരിയായ ദിശ മനസിലാക്കി​ തെരച്ചിൽ തുടർന്നു. ശനി രാവിലെ ഏഴോടെ എല്ലാ തൊഴിലാളികളെയും സുരക്ഷിതമായി തിരികെയെത്തിച്ചു. വെള്ളംവറ്റിച്ച്​ ബോട്ടുയർത്താൻ ശ്രമിച്ചെങ്കിലും മുക്കാൽഭാഗവും മുങ്ങിയതോടെ ഉപേക്ഷിച്ചു. ഫിഷറീസ് എഡിഎഫ് മിലി ഗോപിനാഥ്, എഎഫ്ഇഒ ഡോ. എസ് സാജൻ, മറൈൻ എൻഫോഴ്​സ്‌മെന്റ് ഗാർഡുമാരായ എസ്​ ആദർശ്, എസ്​ ഹരികുമാർ, രാഹുൽ കൃഷ്​ണൻ എന്നിവർ രക്ഷപ്രവർത്തനം ഏകോപിപ്പിച്ചു. ലൈഫ് ഗാർഡുമാരായ ഔസേപ്പച്ചൻ, സ്രാങ്ക് അംജേഷ്, ഡ്രൈവർ രഘു, ലൈഫ് ഗാർഡുമാരായ ജിന്റോ, ജോസഫ് എന്നിവർ പങ്കാളികളായി.