15,000 സ്​ത്രീകൾക്ക്​ തൊഴിൽ

ആലപ്പുഴ

ഓണസമ്മാനമായി ജില്ലയിൽ 15,000 സ്​ത്രീകൾക്ക് തൊഴിൽ നൽകാൻ പ്രത്യേക കാമ്പയിനുമായി കുടുംബശ്രീ. വിജ്ഞാനകേരളം പരിപാടിയുടെ ഭാഗമായാണിത്​. തൊഴിൽ പങ്കാളിത്തം 50 ശതമാനമായി ഉയർത്തുകയും അതുവഴി സ്‌ത്രീകൾക്ക്‌ സുസ്ഥിര വരുമാനവും സാമ്പത്തിക സ്വാശ്രയത്വവും ഉറപ്പാക്കുകയുമാണ്‌ ലക്ഷ്യം. സംസ്ഥാന സർക്കാർ ആവിഷ്​കരിച്ച ‘ഓണത്തിന് ഒരുലക്ഷം തൊഴിൽ’ കാമ്പയിനിലാണ് പദ്ധതി. കുടുംബശ്രീ ഒരുക്കിയ തൊഴിൽമേളകൾ വിജയകരമായിരുന്നു. എന്നാൽ ജില്ലയ്​ക്കും സംസ്ഥാനത്തിനും പുറത്തെ സ്ഥാപനങ്ങളിൽ ലഭിച്ച ജോലി ബഹുഭൂരിപക്ഷം സ്‌ത്രീകളും ഉപേക്ഷിച്ചു. അതിനാലാണ്​ തദ്ദേശസ്ഥാപനങ്ങളുമായി സഹകരിച്ച്​ പ്രദേശിക തൊഴിലവസരങ്ങൾ കണ്ടത്തുന്നത്​. തൊഴിൽദാതാക്കളെയും ആവശ്യക്കാരെയും ബന്ധിപ്പിക്കുന്ന ചുമതല സിഡിഎസുകൾക്കാണ്‌. ഓരോ മേഖലയിലെയും തൊഴിലുടമകളെ നേരിട്ടുകണ്ട്‌ തൊഴിലുകൾ പട്ടികപ്പെടുത്തും. തൊഴിലുടമകൾക്ക്​ നേരിട്ടും രജിസ്​റ്റർ ചെയ്യാം. ജോലി ആവശ്യമായവരെ പ്രാദേശികമായി കണ്ടെത്തി കഴിവ്, അഭിരുചി, വിദ്യാഭ്യാസയോഗ്യത എന്നിവയെ അടിസ്ഥാനപ്പെടുത്തി തരംതിരിക്കും. ഇവർക്ക്‌ തൊഴിൽ നേടാൻ ഹ്രസ്വകാല, ദീർഘകാല നൈപുണ്യ പരിശീലനങ്ങൾ തദ്ദേശസ്ഥാപനാടിസ്ഥാനത്തിൽ ലഭ്യമാക്കും. പഞ്ചായത്തുകളിൽ തൊഴിൽകേന്ദ്രങ്ങളും നഗരസഭയിലും ബ്ലോക്ക് പഞ്ചായത്തിലും ജോബ്​ സ്​റ്റേഷനുകളും കേന്ദ്രീകരിച്ചാണ്​ പ്രവർത്തനം. പുരുഷന്മാർക്കും പദ്ധതി പ്രയോജനപ്പെടും.