ആലപ്പുഴ സ‍ൗത്ത്​ ബ്ലോക്ക്​ കമ്മിറ്റി 
പിരിച്ചുവിട്ട്​ കോൺഗ്രസ്​

ആലപ്പുഴ

വിഭാഗീയതയും കുതികാൽ വെട്ടും കടുത്തതോടെആലപ്പുഴ സൗത്ത് ബ്ലോക്ക്‌ കമ്മിറ്റി പിരിച്ചു വിട്ടു കോൺഗ്രസ് നേതൃത്വം. പുതിയ കമ്മിറ്റി തെരഞ്ഞെടുക്കുന്നതുവരെ ആലപ്പുഴ സ‍ൗത്ത്​ ബ്ലോക്ക്​ നിയന്ത്രിക്കാൻ ഡിസിസി ജനറൽ സെക്രട്ടറി ജി സഞ്ജീവ്​ ഭട്ട്​ കൺവീനറായുള്ള 11 അംഗ അഡ്​ ഹോക് കമ്മിറ്റിയെ ചുമതലപ്പെടുത്തി കെപിസിസി അധ്യക്ഷൻ സണ്ണി ജോസഫ്​ ഉത്തരവിറക്കി. വിഭാഗീയത രൂക്ഷമായ സാഹചര്യത്തിൽ തെരഞ്ഞെടുപ്പിന്​ മുമ്പ്​ ബ്ലോക്ക്‌ കമ്മിറ്റി പിരിച്ചുവിട്ട്​ താൽക്കാലിക പ്രശ്​ന പരിഹാരത്തിനായി ഡിസിസി പ്രസിഡന്റ്​ ബി ബാബു പ്രസാദാണ്​ കമ്മിറ്റി പിരിച്ചുവിടാൻ മേൽകമ്മിറ്റിയോട്​ അഭ്യർഥിച്ചത്​. സംഘടന ചുമതലയുള്ള എഐസിസി ജനറൽ സെക്രട്ടറി കെ സി വേണുഗോപാൽ എംപിയുടെ ബ്ലോക്ക്​ കമ്മിറ്റിയാണ്​ ആലപ്പുഴ സ‍ൗത്ത്​​. പുനഃസംഘടനയിൽ ഒരു വിഭാഗത്തെ മാറ്റിനിർത്തിയതായി ആരോപിച്ച്‌ എ ഗ്രൂപ്പുകാരനായ ഡിസിസി ജനറൽ സെക്രട്ടറി അടക്കം രാജിവച്ചിരുന്നു. മാറ്റിനിർത്തിയവരെ തിരിച്ചെടുക്കാനാകില്ലെന്നും രാജി നൽകിയത്‌ അംഗീകരിക്കണമെന്നുമായിരുന്നു മറുവിഭാഗത്തിന്റെ നിലപാട്​. നിരവധി തവണ ചർച്ച നടത്തിയെങ്കിലും സമവായമില്ലാതെ വന്നതോടെ കെപിസിസി ജനറൽ സെക്രട്ടറി എം ലിജുവിനെ സമവായത്തിന്​ ചുമതലപ്പെടുത്തുകയായിരുന്നു. നിരന്തരമായി നടത്തിയ ചർച്ചകൾക്കൊടുവിൽ ആരെയും മാറ്റിനിർത്തരുതെന്നും എല്ലാവരും ഒരുമിച്ച്‌ പോകണമെന്നും വേണുഗോപാലടക്കമുള്ള നേതൃത്വം താക്കീത്‌ നൽകി. എ ഗ്ര‍‍ൂപ്പ്​ പ്രതിനിധികളെയും ഉൾപ്പെടുത്തി കമ്മിറ്റി പുനസംഘടിപ്പിച്ചെങ്കിലും ഇതിൽ പ്രതിഷേധിച്ച്‌ കുറച്ചുനാളുകളായി മറുവിഭാഗം ഭാരവാഹികളടക്കം പരിപാടികളിൽനിന്ന്‌ വിട്ടുനിൽക്കുകയായിരുന്നു.