ഒറ്റയ്‌ക്കൊരു 
 പദയാത്ര

ആലപ്പുഴ

വി എസിനെ അവസാനമായി ഒരു നോക്കുകാണാൻ, ആദരമർപ്പിക്കാൻ ചെങ്കൊടിയേന്തി മുദ്രാവാക്യം വിളിച്ചു നീങ്ങിയ വീട്ടമ്മ കമ്യൂണിസ്‌റ്റ്‌ പ്രസ്ഥാനത്തോടും വി എസ്സിനോടും നാടിന്റെ വികാരവായ്‌പിന്റെ പ്രതീകമായി. കഞ്ഞിക്കുഴി കണ്ണർകാട് പാന്തേഴം​ ചെങ്ങളക്കാട്ട്​ വെളിയിൽ രമണിബാബു (55) ആണ്​ വി എസിനെ കാണാൻ കാൽനടയായി കിലോമീറ്ററുകൾ സഞ്ചരിച്ച്‌ ഒറ്റയ്‌ക്ക്‌ ഒരു പ്രസ്ഥാനമായി മാറിയത്‌​. കഞ്ഞിക്കുഴിയിൽനിന്ന്​ മുഹമ്മ, മണ്ണഞ്ചേരി വഴി ആലപ്പുഴ റിക്രിയേഷൻ ഗ്ര‍ൗണ്ടിലേക്കാണ് രമണി ഒറ്റയ്‌ക്ക്‌ നടന്നത്‌. ഒരു തോൾസഞ്ചിയും ചെങ്കൊടിയുമായി നടന്നുനീങ്ങുന്ന വീഡിയോയും ഫോട്ടോകളും സമൂഹമാധ്യമങ്ങളിൽ വൈറലായി. സങ്കടക്കടൽ ചങ്കിലിരമ്പുമ്പോഴും ""ഇല്ലാ ഇല്ല മരിക്കുന്നില്ല... ഞങ്ങടെ വി എസ്​ മരിക്കുന്നില്ല'' എന്ന്​ തൊണ്ടപൊട്ടുമുച്ചത്തിൽ മുദ്രവാക്യംവിളിച്ചുകൊണ്ടാണവർ നടന്നു നീങ്ങിയത്​. പലരും വാഹനത്തിൽ കയറാൻ ക്ഷണിച്ചിട്ടും, സ്നേഹത്തോടെ നിരസിച്ചു. ""ഞങ്ങൾ ഒരാൾ മാത്രമായാൽ, അവശേഷിക്കുന്ന ആ ഒരാൾ ഒരു പാർടിയാകും'' എന്ന വാചകങ്ങൾ അക്ഷരാർഥത്തിൽ ഉറപ്പിക്കുന്നതായിരുന്നു ആ കാഴ്​ച. കഴിഞ്ഞ ദിവസങ്ങളിലൊക്കെ ആലപ്പുഴയിൽ സമാനമായ കാഴ്​ചകൾ കാണാൻ സാധിച്ചു. ഭിന്നശേഷിക്കാരും ശാരീരിക ബുദ്ധിമുട്ടുകളുള്ളവരുമെല്ലാം തങ്ങളുടെ പ്രിയപ്പെട്ട നേതാവിനെ ഒരു നോക്ക്​ കാണാൻ കുതിച്ചെത്തി​.