പെരുമഴയിലും അണയാത്ത തീയായ്

ആലപ്പുഴ

കുട്ടനാട്ടിലെ ചേറിൽനിന്ന്​ കേരള ചരിത്രത്തിലേക്ക്​ പടർന്ന സമരജ്വാലയെ ജന്മനാട്​ ഇടനെഞ്ചിലേറ്റുവാങ്ങി. തോരാതെ പെയ്​ത മഴയിലും പുന്നപ്ര വയലാറിന്റെ ചുവന്നമണ്ണ് മറ്റൊരു സമരകാലം പോലെ ത്രസിച്ചുനിന്നു. വെള്ളിടിപോലെ പ്രവഹിച്ച, മൂർച്ചയേറിയ വാക്കുകേൾക്കാൻ ആവേശപൂർവം ഓടിയെത്തിയ അതേ ആൾത്തിരക്ക്​ വെടിയുണ്ടകളെ തോൽപ്പിച്ച സ്വാതന്ത്ര്യദാഹികളുടെ മണ്ണിൽ പ്രിയപുത്രനെ അവസാനയാത്രയിലും അനുഗമിച്ചു. കെപിഎസി ജങ്​ഷനും നങ്ങ്യാർകുളങ്ങരയും ഹരിപ്പാടും തോട്ടപ്പള്ളിയും വി എസിന്റെ പുന്നപ്രയുമെല്ലാം ജനസാഗരമായി. പെയ്​തുതുടങ്ങിയ മാനത്തെ തോൽപ്പിച്ച്​ സ്​ത്രീകളും കുട്ടികളുമടങ്ങുന്ന ജനസഞ്ചയം രാവ്​ പകലാക്കി. കൊല്ലവും ചവറയും കരുനാഗപ്പള്ളിയും കടന്ന്​ ജനനായകൻ എത്തുമ്പോൾ ഒറ്റയ്​ക്കൊറ്റയ്​ക്ക്​ ഉയർന്ന മുദ്രാവാക്യങ്ങൾ ഒഴുകിച്ചേർന്ന്​ കടൽപോലെ അലയടിച്ചു. രാവിലെ 6.53ന്​ ജില്ലാ അതിർത്തിയിൽ വിലാപയാത്ര എത്തുമ്പോൾ മന്ത്രി സജി ചെറിയാൻ, സിപിഐ എം ജില്ലാ സെക്രട്ടറി ആർ നാസർ, നേതാക്കളായ കെ എച്ച്​ ബാബുജാൻ, കെ പ്രസാദ്​, എം സത്യപാലൻ, ജി ഹരിശങ്കർ, കെ ആർ ഭഗീരഥൻ, മനു സി പുളിക്കൽ, എ എം ആരിഫ്​, എം ശിവപ്രസാദ്​, ജനപ്രതിനിധികൾ, വർഗബഹുജന സംഘടന നേതാക്കൾ തുടങ്ങിയവർ കാത്തുനിന്നിരുന്നു. വി എസിന്റെ മൃതദേഹത്തിൽ ആർ നാസർ പുഷ്​പചക്രം സമർപ്പിച്ചു. കലക്​ടർ അലക്​സ്​ വർഗീസ്​ ആദരമർപ്പിച്ചു. ഇരുചക്രവാഹനങ്ങളുടെയും പാർടിപ്രവർത്തകരുടെയും അകമ്പടിയിൽ സമരഗാഥകളുടെ പെരുന്തച്ചൻ ജന്മനാട്ടിലേക്ക്​ അവസാന യാത്ര തുടങ്ങി. പ്രിയ നേതാവിനെ അവസാനമായി കാണാൻ പതിനായിരങ്ങൾ തടിച്ചുകൂടി. ജില്ലയിലെ ആദ്യ പൊതുദർശനകേന്ദ്രമായ കായംകുളം കെപിഎസി ജങ്​ഷനിൽ കെപിഎസി സെക്രട്ടറി എം ഷാജഹാൻ പുഷ്​പചക്രം സമർപ്പിച്ചു.