6 കിലോ കഞ്ചാവുമായി 2 യുവാക്കൾ പിടിയിൽ

മങ്കൊമ്പ്​

ജില്ലാ ലഹരിവിരുദ്ധ സ്​ക്വാഡും രാമങ്കരി പൊലീസും നടത്തിയ പരിശോധനയിൽ ആറ്​ കിലോ കഞ്ചാവുമായി രണ്ട്​ യുവാക്കൾ പിടിയിലായി. പുളിങ്കുന്ന് കായൽപ്പുറം കിഴക്കേ തലയ്​ക്കൽ മാർട്ടിൻ- (36), പുളിങ്കുന്ന് വാലയത്ത് അറപ്പുറം വീട്ടിൽ റിനോജ് -(40) എന്നിവരെയാണ് പിടികൂടിയത്. ലോ ആൻഡ് ഓർഡർ എഡിജിപിയുടെ ഓപ്പറേഷൻ ഡി ഹണ്ടിന്റെ ഭാഗമായി എ സി റോഡിൽ കിടങ്ങറ പാലത്തിന് സമീപം ബുധൻ രാവിലെ നടത്തിയ വാഹന പരിശോധനയിലാണ് കഞ്ചാവുമായി യുവാക്കൾ പിടിയിലായത്​. റിനോജ് ഒഡീഷയിൽനിന്ന്​ കഞ്ചാവ് ബൈക്കിൽ നാട്ടിലെത്തിക്കുകയും മാർട്ടിൻ നാട്ടിൽ വിൽക്കുകയുമായിരുന്നു. ഹൈദരാബാദിൽ സ്വകാര്യ ആശുപത്രിയിൽ നഴ്​സാണ് റിനോജ്. കുടുംബസമേതം ഹൈദരാബാദിൽ താമസിക്കുന്ന ഇയാൾ മാസത്തിൽ പല പ്രാവശ്യം അവധിക്ക്​ നാട്ടിൽ കഞ്ചാവ്​ എത്തിക്കുകയായിരുന്നു. കിലോയ്​ക്ക്​ 5000 രൂപയ്​ക്ക് വാങ്ങുന്ന കഞ്ചാവ് 40,000 - രൂപയ്​ക്കാണ് വിറ്റിരുന്നത്. ഇവർക്ക്​ പിന്നിലെ ചെറുകിട വിതരണക്കാരെ എത്രയുംവേഗം പിടികൂടുമെന്ന്​ പൊലീസ്​ പറഞ്ഞു. നർക്കോട്ടിക് സെൽ ഡിവൈഎസ്​പി ബി പങ്കജാക്ഷന്റെ നേതൃത്വത്തിലുള്ള ജില്ലാ ലഹരിവിരുദ്ധ സ്​ക്വാഡും അമ്പലപ്പുഴ ഡിവൈഎസ്​പി കെ എൻ രാജേഷിന്റെ നേതൃത്വത്തിൽ രാമങ്കരി എസ്​എച്ച്​ഒ ജയകുമാർ, എസ്​ഐ സെബാസ്റ്റ്യൻ, സിപിഒമാരായ ജോസഫ്, സുൾഫിക്കർ എന്നിവരാണ് പ്രതികളെ പിടികൂടിയത്.