എസ്‌എസ്‌എൽസി ; 99.76 % , 5317 പേർക്ക്‌ ഫുൾ എ പ്ലസ്‌

കൊച്ചി

എസ്‌എസ്‌എൽസി പരീക്ഷയിൽ 99.76 ശതമാനം വിജയം നേടി ജില്ല മൂന്നാംസ്ഥാനത്ത്‌. കഴിഞ്ഞവർഷം 99.86 ശതമാനം വിജയത്തോടെയാണ്‌ ജില്ല സംസ്ഥാനത്ത്‌ മൂന്നാംസ്ഥാനം നേടിയത്‌. ആലുവ, എറണാകുളം, കോതമംഗലം, മൂവാറ്റുപുഴ എന്നീ വിദ്യാഭ്യാസജില്ലകളിലായി ഈ വർഷം 32,868 വിദ്യാർഥികളാണ്‌ പരീക്ഷ എഴുതിയത്‌. ഇതിൽ 32,789 പേർ ഉപരിപഠനത്തിന്‌ യോഗ്യത നേടി.- പെൺകുട്ടികൾ–- 16,063, ആൺകുട്ടികൾ–16,726.

എല്ലാ വിഷയത്തിനും എ പ്ലസ്‌ നേടിയത്‌ 5317 പേരാണ്‌. പെൺകുട്ടികളാണ്‌ എ പ്ലസ്‌ നേട്ടത്തിൽ മുന്നിൽ–- 3576 പേർ. 1741 ആൺകുട്ടികളും ഈ നേട്ടം കൈവരിച്ചു. കഴിഞ്ഞവർഷം 5915 പേർ എല്ലാ വിഷയത്തിനും എ പ്ലസ്‌ നേടിയിരുന്നു. വിദ്യാഭ്യാസജില്ലകളിൽ ആലുവ– 2199, എറണാകുളം– 1543, കോതമംഗലം– 885, മൂവാറ്റുപുഴ– 690 എന്നിങ്ങനെയാണ്‌ എല്ലാ വിഷയത്തിനും എ പ്ലസ്‌ നേടിയവരുടെ എണ്ണം.

വിദ്യാഭ്യാസജില്ലകളിൽ കോതമംഗലവും മൂവാറ്റുപുഴയും വിജയത്തിൽ ഒപ്പത്തിനൊപ്പമാണ്‌. 99.81 ശതമാനം. ആലുവ– 99.78, എറണാകുളം– 99.69- എന്നിങ്ങനെയാണ്‌ മറ്റു രണ്ടിടത്തെ വിജയം. 270 സ്കൂളുകൾ നൂറുശതമാനം വിജയം നേടി. ഇതിൽ 82 സർക്കാർ സ്കൂളുകളും 138 എയ്ഡഡ് സ്കൂളുകളും 50 അൺ എയ്ഡഡ് സ്കൂളുകളുമുണ്ട്‌.