വ്യവസായി- സംരംഭക സംഗമം നടത്തി

കളമശേരി

കളമശേരി കാർഷികോത്സവത്തോടനുബന്ധിച്ച്‌ വ്യവസായികളുടെയും സംരംഭകരുടെയും സംഗമം പട്ടികജാതി–വർഗ പിന്നാക്കക്ഷേമമന്ത്രി ഒ ആർ കേളു ഉദ്ഘാടനം ചെയ്തു.

പരമാവധി ഉൽപ്പന്നങ്ങൾ നമ്മുടെ സംസ്ഥാനത്തുതന്നെ ഉൽപ്പാദിപ്പിക്കേണ്ടത് വർത്തമാനകാലത്തിന്റെ ആവശ്യമാണെന്ന് മന്ത്രി പറഞ്ഞു. വ്യവസായമന്ത്രി പി രാജീവ് അധ്യക്ഷനായി. ചടങ്ങിൽ കേരള ബ്രാൻഡ് സർട്ടിഫിക്കറ്റ് വിതരണം ചെയ്തു. എംഎസ്എംഇ യൂണിറ്റുകളുടെ ഉൽപ്പന്നങ്ങളുടെ ഓൺലൈൻ വിപണനത്തിനുള്ള മൊബൈൽ ആപ്ലിക്കേഷൻ പുറത്തിറക്കി. ​

വ്യവസായ പ്രിൻസിപ്പൽ സെക്രട്ടറി എ പി എം മുഹമ്മദ് ഹനീഷ്, ഏലൂർ നഗരസഭാ ചെയർമാൻ എ ഡി സുജിൽ, ജില്ലാ വ്യവസായകേന്ദ്രം ജനറൽ മാനേജർ പി എ നജീബ്, സംസ്ഥാന ചെറുകിട വ്യവസായ അസോസിയേഷൻ പ്രസിഡന്റ് എ നിസാറുദ്ദീൻ, ജില്ലാ പ്രസിഡന്റ് ടോം തോമസ്, കളമശേരി ഇൻഡസ്ട്രിയൽ എസ്റ്റേറ്റ് അസോസിയേഷൻ പ്രസിഡന്റ് ഒ എ നിസാം, എടയാർ ഇൻഡസ്ട്രിയൽ എസ്റ്റേറ്റ് അസോസിയേഷൻ പ്രസിഡന്റ് നരേന്ദ്രകുമാർ, കളമശേരി കാർഷികോത്സവം ജനറൽ കൺവീനർ വിജയൻ പള്ളിയാക്കൽ തുടങ്ങിയവർ സംസാരിച്ചു.