സ്വതന്ത്ര ജുഡീഷ്യറി കാലഘട്ടത്തിന്റെ അനിവാര്യത: ജസ്റ്റിസ്​ വി ജി അരുൺ

കൊച്ചി

സ്വതന്ത്രമായ ജുഡീഷ്യൽ സംവിധാനം കാലഘട്ടത്തിന്റെ അനിവാര്യതയാണെന്ന്​ ജസ്റ്റിസ്​ വി ജി അരുൺ. ജുഡീഷ്യറിയിൽ ബാഹ്യ ഇടപെടലുകൾ ഉണ്ടെന്ന ചില സ‍ൂചനകൾ പുറത്തുവരുന്നുണ്ട്​. അത്​ അപകടകരമാണെന്നും അദ്ദേഹം പറഞ്ഞു. ഓൾ ഇന്ത്യ ലോയേഴ്​സ്​ യൂണിയൻ യുവ അഭിഭാഷകസമിതി ജില്ലാ കൺവൻഷൻ ഉദ്​ഘാടനം ചെയ്യുകയായിരുന്നു അദ്ദേഹം.

യുവ അഭിഭാഷകസമിതി ജില്ലാ ചെയർപേഴ്സണായി നമിത ജോർജിനെയും കൺവീനറായി പി ആദിലിനെയും തെരഞ്ഞെടുത്തു. ബാർ കൗൺസിലിൽ ദളിത്, വനിത,- യുവ അഭിഭാഷകരുടെ പങ്കാളിത്തം ഉറപ്പാക്കുക, ആഭ്യന്തര പരാതിപരിഹാരസമിതികൾ രൂപീകരിക്കുക എന്നീ പ്രമേയങ്ങൾ അംഗീകരിച്ചു. യുവ അഭിഭാഷകസമിതി സ‍ൗത്ത്​സോൺ കൺവീനർ മുഹമ്മദ്​ ഇബ്രാഹിം അബ്ദുൾ സമദ്​ അധ്യക്ഷനായി.

ഡയറക്ടർ ജനറൽ ഓഫ്​ പ്രോസിക്യൂഷൻ ടി എ ഷാജി, എഐഎൽയു സംസ്ഥാന വൈസ്​​ പ്രസിഡന്റ്​ എൻ സി മോഹനൻ, ജില്ലാ പ്രസിഡന്റ്​ ടി പി രമേഷ്​, ബാർ ക‍ൗൺസിൽ അംഗം കെ കെ നാസർ, പി ആദിൽ, മായ കൃഷ്​ണൻ, നമിത ജോർജ്​ എന്നിവർ സംസാരിച്ചു.