കാഞ്ഞങ്ങാട്ട്‌ സൗത്തിൽ 
പാചകവാതക ടാങ്കർ മറിഞ്ഞു

കാഞ്ഞങ്ങാട്‌

ദേശീയപാതയിൽ കാഞ്ഞങ്ങാട്‌ സൗത്തിൽ പാചകവാതക ടാങ്കർ ലോറി നിയന്ത്രണം വിട്ടുമറിഞ്ഞു. ലോറിയിൽനിന്നും വാതകം ചോർന്നിട്ടില്ലെന്ന് ഉറപ്പുവരുത്തി മുൻകരുതൽ നടപടി സ്വീകരിച്ചു. വളപട്ടണത്തുനിന്ന് ഖലാസികളെത്തി വെള്ളി രാവിലെ ഒമ്പതോടെ ലോറി ഉയർത്തുന്ന നടപടി ആരംഭിക്കും. വ്യാഴാഴ്‌ച പകൽ ഒന്നോടെയാണ്‌ അപകടം. മംഗളൂരുവിലെ എൽപിജി പ്ലാന്റിൽനിന്ന്‌ കോയമ്പത്തൂരിലേക്ക്‌ പോവുകയായിരുന്ന ടാങ്കർ ലോറിയാണ്‌ മറിഞ്ഞത്‌. ദേശീയപാത നിർമാണം നടക്കുന്നതിനാൽ വീതി കുറഞ്ഞ സർവീസ്‌ റോഡിൽ എതിരെ വന്ന ബസിന് സൈഡ് കൊടുക്കുന്നതിനിടെ റോഡിന് താഴെയുള്ള ചതുപ്പിലേക്ക് മറിയുകയായിരുന്നു. അപകടത്തിൽ ഡ്രൈവർക്ക്‌ നിസാര പരിക്കേറ്റു. ഹൊസ്‌ദുർഗ്‌ പൊലീസും കാഞ്ഞങ്ങാട്‌ അഗ്നിരക്ഷാസേനയുമെത്തി സ്ഥലത്ത്‌ സുരക്ഷാക്രമീകരണം എർപ്പെടുത്തിയിട്ടുണ്ട്‌. പരിസരത്തെ വീട്ടുകാരെ മാറ്റിപാർപ്പിച്ചു. അപകടത്തെത്തുടർന്ന്‌ ദേശീയപാത വഴിയുള്ള ഗതാഗതം താറുമാറായി. നഗരത്തിൽ ഗതാഗതക്കുരുക്കും രൂക്ഷമായി. പ്രാദേശിക അവധി; ഒരു കിലോമീറ്റര്‍ 
പരിധിയില്‍ ജാ​ഗ്രതാ നിര്‍ദേശം വെള്ളി രാവിലെ ഒമ്പതിന്‌ ടാങ്കർ ലോറി ഉയർത്തുന്ന നടപടിയുടെ ഭാഗമായി കൊവ്വൽ സ്റ്റോറിന്റെ ഒരു കിലോമീറ്റർ പരിധിയിൽ അതീവ ജാ​ഗ്രതാ നിർദേശം നൽകി. കാഞ്ഞങ്ങാട് സൗത്ത് മുതൽ ഐങ്ങോത്ത് വരെ 18, 19, 26 വാർഡുകളിൽ പ്രാദേശിക അവധി പ്രഖ്യാപിച്ചു. സ്‌കൂൾ, അങ്കണവാടികൾ, കടകൾ ഉൾപ്പെടെ മുഴുവൻ സ്ഥാപനങ്ങൾക്കും അവധി ബാധകമായിരിക്കും. രാവിലെ എട്ട് മുതൽ കാഞ്ഞങ്ങാട്‌ സൗത്ത് മുതൽ പടന്നക്കാട് വരെ ദേശീയപാത വഴിയുള്ള ഗതാഗതം പൂർണമായും തടസ്സപ്പെടും. വാഹനങ്ങൾ വഴി തിരിച്ചുവിടും. വീടുകളിൽ പാചകവാതക സിലണ്ടർ ഉപയോഗിക്കാനോ പുകവലിക്കാനോ, ഇൻവർട്ടർ ഉപയോഗിച്ചുള്ള വൈദ്യുതിയോ മറ്റു ഉപകരണങ്ങളോ ഉപയോഗിക്കാൻ പാടില്ല. വാഹനങ്ങൾ സ്‌റ്റാർട്ട് ചെയ്യാനോ അപകടം നടന്ന സ്ഥലത്ത്‌ വീഡിയോ ചിത്രീകരിക്കാനോ പാടില്ല. പൊതുജനങ്ങൾക്കുള്ള പ്രവേശനവും പൂർണമായും നിരോധിക്കും. വൈദ്യുതി ബന്ധം ടാങ്കർ സുരക്ഷിതമായി ഉയർത്തുന്നതുവരെ ഉണ്ടാവില്ലെന്നും ജില്ലാ ദുരന്തനിവാരണ അതോറിറ്റി അറിയിച്ചു. ഇന്ന്‌ ഗതാഗത നിയന്ത്രണം ടാങ്കർ ലോറി മാറ്റുന്നതുമായി ബന്ധപ്പെട്ട് വാഹന ഗതാഗതത്തിൽ പൊലീസ് ക്രമീകരണം ഏർപ്പെടുത്തി. വെള്ളി രാവിലെ 9.30 മുതൽ കാഞ്ഞങ്ങാട് നിന്നും നീലേശ്വരത്തേക്ക് വരുന്ന വാഹനങ്ങൾ പുതിയകോട്ടയിൽനിന്നും കല്ലൂരാവി വഴി നീലേശ്വരത്തേക്കും നീലേശ്വരത്തുനിന്ന് കാഞ്ഞങ്ങാട്ടേക്ക് വരുന്ന വാഹനങ്ങൾ മടിക്കൈ കല്യാൺ റോഡ്, ആലയി വഴി കാഞ്ഞങ്ങാടും എത്തിച്ചേരേണം. ഭാരമുള്ള വാഹനങ്ങൾ ആ സമയത്ത് നിർത്തിയിടണം.