ദാമോദരേട്ടൻ പുസ്‌തകവുമായെത്തി

കാഞ്ഞങ്ങാട്‌

ഇന്ന പുസ്‌തകം വേണമെന്ന്‌ പറഞ്ഞ്‌ വിളിച്ചറിയിച്ചാൽ മതി. മണിക്കൂറുകൾക്കുള്ളിൽ വീട്ടുമുറ്റത്ത്‌ സൈക്കിൾ ബെൽ മുഴങ്ങും. സൈക്കിളിൽ സഞ്ചരിച്ച്‌ പുസ്തകങ്ങൾ വീടുകളിലെത്തിക്കുകയാണ്‌ കുശാൽന​ഗറിലെ എച്ച് കെ ദാമോദരൻ. കുശാൽ ന​ഗർ നായനാർ സ്മാരക ​​ഗ്രന്ഥാലയം സെക്രട്ടറിയായ ഇ​ദ്ദേഹം ഇവിടെനിന്ന്‌ പുസ്തകങ്ങളെടുത്ത്‌ വീടുകളിലെത്തിക്കുന്നു. പത്തുവർഷമായി ദൗത്യം തുടങ്ങിയിട്ട്‌. ​ 76 വീടുകളിൽ പുസ്തകമെത്തിച്ചു. വീടുകളിൽപോയി പുസ്തകം വായിച്ചിട്ടുണ്ടോയെന്ന് ഉറപ്പുവരുത്തും. പൂർണമായും വായിച്ചിട്ടുണ്ടെന്ന് വ്യക്തമായാൽ തിരികെവാങ്ങും. വായനക്കാർ ​ഗ്രന്ഥാലയത്തിലേക്ക് വന്നില്ലെങ്കിൽ അവരെതേടി പുസ്തകങ്ങളുമായെത്തും. ഹൊസ്ദുർ​ഗ് താലൂക്ക് ലൈബ്രറി കൗൺസിൽ അം​ഗംകൂടിയായ ദാമോദരൻ എഴുത്തുകാരൻ, നാടകകൃത്ത്, പൊതുപ്രവർത്തകൻ എന്നീ നിലകളിലും അം​ഗീകാരം നേടി. ‘ഹൃദയതാളം’ കഥാസമാഹാരവും പുറത്തിറക്കി. നോവലും രചിച്ചു. ദേശാഭിമാനി വാരികയിൽ നിരവധി കഥകൾ പ്രസിദ്ധീകരിച്ചു. ദുർ​ഗാ ഹൈസ്കൂൾ സിൽവർ ജൂബിലി സാഹിത്യമത്സരത്തിൽ ഒന്നാംസ്ഥാനം നേടി. അദ്ദേഹത്തിന്റെ ‘ഞങ്ങൾക്ക് മരണമില്ല’ തെരുവുനാടകം അതിയാമ്പൂർ ബാലബോധിനി വായനശാല പ്രവർത്തകർ അവതരിപ്പിച്ചു. ഹൊസ്ദുർ​ഗ് ഭാവനാ ക്ലബ് അവതരിപ്പിച്ച പുഷ്പാഞ്ജലിയും കുശാൽന​ഗർ കലാവേദിയുടെ ഉഷ്ണക്കാറ്റും ദാമോദരന്റെ രചനകളാണ്. ദേശാഭിമാനി ബാലസംഘം ഹൊസ്ദുർ​ഗ് താലൂക്ക് പ്രസിഡന്റ്‌, എസ്എഫ്ഐ താലൂക്ക് പ്രസിഡന്റ്, ഡിവൈഎഫ്ഐ പഞ്ചായത്ത് സെക്രട്ടറി, സിപിഐ എം ഹൊസ്ദുർ​ഗ്, കുശാൽനഗർ ബ്രാഞ്ച് സെക്രട്ടറി തുടങ്ങിയ നിലകളിലും പ്രവർത്തിച്ചു. 1978ൽ കാഞ്ഞങ്ങാട്ട് പഞ്ചായത്തംഗമായിരുന്നു. ഡിവൈഎഫ്ഐ താലൂക്ക് ഓഫീസ് പിക്കറ്റിങ്ങിൽ പങ്കെടുത്തതിന്‌ കണ്ണൂർ സെൻട്രൽ ജയിലിൽ ശിക്ഷ അനുഭവിച്ചു. കാഞ്ഞങ്ങാട് ടൗണിൽ ‘അടിയന്തരാവസ്ഥ അറബിക്കടലിൽ’ പോസ്റ്റർ പതിച്ചതിന്റെ പേരിൽ പൊലീസിന്റെ ക്രൂരമർദനത്തിനിരയായി. ഭാര്യ : പി മീനാക്ഷി. ദിവ്യ, ദീഷ്മ, ദൃശ്യ എന്നിവർ മക്കൾ.