ദ്രുതപ്രതികരണ സേനയിൽ കൂടുതൽ 
ജീവനക്കാരെ നിയമിക്കും: മന്ത്രി

മണ്ണാർക്കാട്

വന്യമൃഗശല്യം പരിഹരിക്കുന്നതിനായി മണ്ണാർക്കാട് മേഖലയിലെ ദ്രുതപ്രതികരണസേനയിൽ കൂടുതൽ ജീവനക്കാരെ നിയോഗിക്കുമെന്ന് മന്ത്രി കെ ശശീന്ദ്രൻ പറഞ്ഞു. മന്ത്രിയും ജനപ്രതിനിധികളും മണ്ണാർക്കാട് ഡിഎഫ്ഒയുമായി നടത്തിയ ചർച്ചയിലാണ് തീരുമാനം. അട്ടപ്പാടിയിലെ വന്യമൃഗശല്യത്തിന് പരിഹാരം കാണുന്നതിന്​ വനംവകുപ്പിന്റെ നേതൃത്വത്തില്‍ ആഗസ്റ്റ് ഒന്നിന് അട്ടപ്പാടി ബ്ലോക്ക് പഞ്ചായത്ത് ഓഫീസില്‍ യോഗം ചേരും. കാട്ടുപന്നി ശല്യം പരിഹരിക്കാൻ മൂന്നുദിവസം നീണ്ടുനില്‍ക്കുന്ന ഡ്രൈവ് നടത്താൻ മന്ത്രി ഡിഎഫ്ഒയോട് ഉത്തരവിട്ടു. അട്ടപ്പാടി ബ്ലോക്ക് പഞ്ചായത്ത് പ്രസിഡന്റ് മരുതി മുരുകൻ, സ്ഥിരം സമിതി ചെയർപേഴ്​സൺ സനോജ്, പഞ്ചായത്തംഗം ഡി രവി, മണികണ്ഠൻ പൊറ്റശേരി, ഡിഎഫ്ഒ സി അബ്ദുള്‍ ലത്തീഫ്, റസാഖ് മൗലവി, മോഹൻ ഐസക്​, സദക്കത്തുള്ള പടലത്ത് എന്നിവർ യോഗത്തിൽ പങ്കെടുത്തു.