വന്യജീവി അക്രമം: സാങ്കേതികവിദ്യ *പ്രയോജനപ്പെടുത്തണം– ഇ പി ജയരാജൻ

തിരുവമ്പാടി

വന്യജീവി ആക്രമണങ്ങളിൽനിന്ന്‌ കൃഷിയും ഉപജീവനമാർഗങ്ങളും സംരക്ഷിക്കാൻ ആധുനിക ശാസ്ത്രസാങ്കേതികവിദ്യ പ്രയോജനപ്പെടുത്തണമെന്ന് അഖിലേന്ത്യാ കിസാൻസഭ വൈസ് പ്രസിഡന്റ് ഇ പി ജയരാജൻ പറഞ്ഞു. കർഷക മുന്നേറ്റ ജാഥക്ക് തിരുവമ്പാടിയിൽ നൽകിയ സ്വീകരണത്തിൽ സംസാരിക്കുകയായിരുന്നു ജാഥാ ലീഡർകൂടിയായ ഇ പി.

വന്യജീവികളുടെ നീക്കം നിരീക്ഷിക്കാൻ ഡ്രോൺ, ജിപിഎസ് ഉൾപ്പെടെ സംവിധാനങ്ങൾ പ്രയോജനപ്പെടുത്തണം. വനങ്ങളോട് ചേർന്ന് സിസിടിവി സ്ഥാപിക്കണം. സംസ്ഥാന സർക്കാർ തയ്യാറാക്കിയ 650 കോടിയുടെ പദ്ധതിക്ക് കേന്ദ്രം അംഗീകാരം നൽകണം. പ​ദ്ധതിക്ക് അംഗീകാരം നൽകണമെന്ന് പാർലമെന്റിൽ ആവശ്യപ്പെടാൻ കേരളത്തിൽനിന്നുപോയ 19 യുഡിഎഫ് എംപിമാരും തയ്യാറാകുന്നില്ല.

വന്യജീവികൾക്ക് സംരക്ഷണംനൽകുകയും മനുഷ്യനെയും കൃഷിയെയും പരിഗണിക്കാതിരിക്കുകയുംചെയ്യുന്ന 1972ലെ വന നിയമം മാറണം. വന്യജീവികൾക്ക് കിട്ടുന്ന പരിരക്ഷ മനുഷ്യനും കൃഷിക്കും വേണമെന്നും അദ്ദേഹം പറഞ്ഞു.