മനഃസാക്ഷി വേണ്ടേ മരുന്നിനെങ്കിലും

കോട്ടയം

കോട്ടയം നഗരസഭയിൽ 30 –- 40 വർഷം പാതയോരങ്ങൾ ശുചീകരിച്ചും നഗരം മാലിന്യമുക്തമാക്കിയും സ്വന്തം ജീവിതം രോഗാതുരമാക്കിയ പാവങ്ങളെയാണ്‌ പെൻഷൻ നൽകാതെ നഗരസഭ ഭരണാധികാരികൾ വെല്ലുവിളിക്കുന്നത്‌. വിരമിച്ച ശുചീകരണ തൊഴിലാളികൾ അവകാശപ്പെട്ട പെൻഷനായി നഗരസഭയിൽ പ്രതിഷേധമുയർത്തിയിട്ടും ചെയർപേഴ്‌സനടക്കമുള്ളവർ തിരിഞ്ഞുപോലും നോക്കാതെ പിന്തള്ളി. പെൻഷൻ തുക വൈകുന്നതിൽ ചെയർപേഴ്​സന്റെയും സെക്രട്ടറിയുടെയും ചേംബറിനുമുന്നിൽ​ കുത്തിയിരുന്ന്​ പ്രതിഷേധിച്ചെങ്കിലും നിങ്ങളാരാ എന്ന ഭാവമായിരുന്നു ഭരണാധികാരികൾക്ക്‌. പണം കിട്ടിയിട്ട്‌ വേണം പലർക്കും മരുന്ന്‌ വാങ്ങാനും, വാടക നൽകാനും. നേരത്തെ മാസത്തിന്റെ ആദ്യ ആഴ്ചയിൽതന്നെ പെൻഷൻ കിട്ടുമായിരുന്നു. എന്നാൽ ഇപ്പോൾ 20–-ാം തീയതി ആയാലും കിട്ടില്ല. ഉദ്യോഗസ്ഥരുടെ പടിക്കൽ കയറിയിറങ്ങിയിട്ടും പരിഹാരമില്ലാത്ത അവസ്ഥ. പെൻഷൻ വാങ്ങുന്ന ഭൂരിഭാഗംപേരും ​പ്രായാധിക്യം മൂലമുള്ള രോഗങ്ങളാൽ വലയുന്നവരാണ്. പലരും ആശ്രയിക്കുന്നത്‌ ഈ പെൻഷൻതുകയാണ്‌. ഇക്കൂട്ടത്തിൽ കാൻസർ രോഗത്താൽ വലയുന്നവരുടെ കുടുംബാംഗങ്ങളും ഉണ്ട്‌.