പ്ലസ്‌ വൺ: രണ്ടാം അലോട്ട്‌മെന്റിൽ ഇന്നുകൂടി പ്രവേശനം നേടാം

തിരുവനന്തപുരം : ഹയർ സെക്കൻഡറി ഒന്നാംവർഷ പ്രവേശനത്തിന്റെ രണ്ടാം അലോട്ട്‌മെന്റിൽ ഉൾപ്പെട്ടവർക്ക്‌ ബുധൻ വൈകിട്ട്‌ അഞ്ചുവരെ പ്രവേശനം നേടാം. ആകെ 2,43,155 പേരാണ്‌ രണ്ടാം അലോട്ട്‌മെന്റിൽ ഉൾപ്പെട്ടത്‌. ഇതിൽ 21,887 പേർ പുതിയതായി അലോട്ട്‌മെന്റ്‌ ലഭിച്ചവരാണ്‌. മെറിറ്റ് ക്വോട്ടയിൽ ഒന്നാം ഓപ്ഷനിൽ അലോട്ട്മെന്റ്‌ ലഭിച്ചവർ ഫീസടച്ച് സ്ഥിരപ്രവേശനം നേടണം. താഴ്‌ന്ന ഓപ്ഷനിൽ അലോട്ട്മെന്റ് ലഭിച്ചവർക്ക് താൽക്കാലിക പ്രവേശനമോ സ്ഥിരപ്രവേശനമോ നേടാം.

അലോട്ട്‌മെന്റ്‌ ലഭിച്ചിട്ടും പ്രവേശനം നേടാതിരിക്കുന്ന വിദ്യാർഥികളെ തുടർന്ന്‌ പരിഗണിക്കില്ല. രണ്ടാം അലോട്ട്മെന്റിനോടൊപ്പം കമ്യൂണിറ്റി ക്വോട്ട പ്രവേശനവും നടക്കും. മോഡൽ റെസിഡൻഷ്യൽ സ്‌കൂളുകളിൽ (എംആർഎസ്‌) പ്രവേശനത്തിനുള്ള രണ്ടാമത്തെ അലോട്ട്‌മെന്റും പ്രസിദ്ധീകരിച്ചു. ബുധൻ വൈകിട്ട്‌ അഞ്ചിന്‌ മുമ്പ്‌ പ്രവേശനം നേടണം.

ഇതുവരെ അപേക്ഷിക്കാത്തവർക്കും മുഖ്യഘട്ടത്തിൽ തെറ്റായ വിവരങ്ങൾ നൽകിയതിനാലോ ഓപ്ഷനുകൾ നൽകാത്തതിനാലോ അലോട്ട്മെന്റിന് പരിഗണിക്കാത്തവർക്കും സപ്ലിമെന്ററി ഘട്ടത്തിൽ അപേക്ഷിക്കാം. സപ്ലിമെന്ററി അലോട്ട്മെന്റിനായുള്ള ഒഴിവും നോട്ടിഫിക്കേഷനും മുഖ്യഘട്ട പ്രവേശന സമയപരിധിക്കുശേഷം വെബ്സൈറ്റിൽ പ്രസിദ്ധീകരിക്കും. വിവരങ്ങൾക്ക്‌: www.hs cap.kerala.gov.in