ഫാക്‌ടിൽ ടെക്‌നീഷ്യൻ,
 ക്രാഫ്‌റ്റ്‌സ്‌മാൻ തസ്തികകളിൽ ഒഴിവ്

കൊച്ചി: കേന്ദ്ര പൊതുമേഖലാ സ്ഥാപനമായ കൊച്ചിയിലെ ഫെർട്ടിലൈസേഴ്‌സ് ആൻഡ് കെമിക്കൽസ് ട്രാവൻകൂർ ലിമിറ്റഡ് (FACT) ടെക്നീഷ്യൻ, ക്രാഫ്റ്റ്‌സ്‌മാൻ തസ്തികകളിൽ കരാർ നിയമനം നടത്തുന്നു. ഒഴിവുകളുടെ എണ്ണം വ്യക്തമാക്കിയിട്ടില്ല. ഫാക്ടിന്റെ ഔദ്യോഗിക വെബ്സൈറ്റ് വഴി ഓൺലൈനായി അപേക്ഷിക്കാം. തസ്തികകൾ: ​ടെക്നീഷ്യൻ (ഇൻസ്ട്രുമെന്റേഷൻ), ​ക്രാഫ്റ്റ്‌സ്‌മാൻ (മെഷീനിസ്റ്റ്), ​ക്രാഫ്റ്റ്‌സ്‌മാൻ (ഓട്ടോ ഇലക്ട്രീഷ്യൻ). യോഗ്യത : ​ടെക്നീഷ്യൻ (ഇൻസ്ട്രുമെന്റേഷൻ): ഇൻസ്ട്രുമെന്റേഷൻ എൻജിനിയറിങ്ങിൽ ഡിപ്ലോമ. ​ക്രാഫ്റ്റ്‌സ്‌മാൻ (മെഷീനിസ്റ്റ്): എസ്എസ്എൽസിക്കുശേഷം മെഷീനിസ്റ്റ് ട്രേഡിൽ നാഷണൽ ട്രേഡ് സർട്ടിഫിക്കറ്റ്. ​ക്രാഫ്റ്റ്‌സ്‌മാൻ (ഓട്ടോ ഇലക്ട്രീഷ്യൻ): എസ്എസ്എൽസിക്ക് ശേഷം മെക്കാനിക് ഓട്ടോ ഇലക്ട്രിക്കൽ ആൻഡ് ഇലക്ട്രോണിക്സ് ട്രേഡിൽ നാഷണൽ ട്രേഡ് സർട്ടിഫിക്കറ്റ്. യോഗ്യത സംബന്ധിച്ച കൂടുതൽ വിവരങ്ങൾ ഔദ്യോഗിക വിജ്ഞാപനത്തിൽ ലഭ്യമാണ്.

ഓൺലൈൻ ഫോം സമർപ്പിച്ചശേഷം ​പ്രിൻ്റ് ഔട്ടും സർട്ടിഫിക്കറ്റുകളുടെ സ്വയം സാക്ഷ്യപ്പെടുത്തിയ പകർപ്പുകളും സഹിതം താഴെ നൽകിയിട്ടുള്ള വിലാസത്തിലേക്ക് സ്പീഡ് പോസ്റ്റ്/രജിസ്റ്റേർഡ് പോസ്റ്റ് അയക്കണം. വിലാസം: ഡെപ്യൂട്ടി ജനറൽ മാനേജർ (എച്ച്‌ആർ), ഫാക്ട്‌ ലിമിറ്റഡ്‌, കോർപ്പറേറ്റ്‌ ഓഫീസ്‌, ഉദ്യോഗമണ്ഡൽ, പിൻ 683 501, കേരള. ​കവറിന് മുകളിൽ "Application for the post of (Post Name) – Ad. 08/2025" എന്ന് രേഖപ്പെടുത്തണം.

​യോഗ്യതാ പരീക്ഷയുടെ മാർക്ക്‌, ഫാക്ട് അപ്രന്റിസുകൾക്കുള്ള മുൻഗണന, പാസായ വർഷം, ജനനത്തീയതി എന്നിവ അടിസ്ഥാനമാക്കിയുള്ള മെറിറ്റ് ലിസ്റ്റ് പ്രകാരമായിരിക്കും തെരഞ്ഞെടുപ്പ്.ഓൺലൈൻ അപേക്ഷ സമർപ്പിക്കേണ്ട അവസാന തീയതി നവംബർ 15. അപേക്ഷയുടെ ഹാർഡ് കോപ്പി ലഭിക്കേണ്ട അവസാന തീയതി നവംബർ 21. വെബ്‌സൈറ്റ്‌: www.fact.co.in.