എല്ലാം തിരുത്തി എഴുതപ്പെടുന്ന കാലത്ത് രേഖകളിലൂടെ ചരിത്രം ഓർത്തെടുക്കുകയാണ് ഈ പംക്തി. വിവിധ ആർക്കൈവുകളിൽ ലഭ്യമായ രേഖകളിലൂടെ പോയനാളുകളിലേക്ക് ആധികാരികതയോടെയുള്ള തിരിഞ്ഞുനോട്ടത്തിനാണ് ശ്രമം. കാലവും വ്യക്തികളും ചരിത്രസന്ദർഭങ്ങളും ഈ കുറിപ്പുകളിൽ പ്രതിഫലിക്കുന്നു.

വൈക്കത്ത്‌ തിരുവിതാംകൂർ പൊലീസ്‌ പി കൃഷ്‌ണപിള്ള എന്ന ‘അപകടകാരി’യായ കോൺഗ്രസ്‌ നേതാവിനെ അറസ്റ്റുചെയ്‌ത വിവരം ഇംഗ്ലീഷുകാരനായ മലബാർ പൊലീസ്‌ സൂപ്രണ്ട്‌ ഡി ക്രോസ്‌ലിയെ അറിയിച്ചത്‌ തിരുവിതാംകൂർ ഐജി ജി എസ്‌ എ കരിം സാഹിബാണ്‌. അറസ്റ്റുവിവരങ്ങൾ സൂക്ഷ്‌മമായി പരിശോധിച്ച ക്രോസ്‌ലി ഒരു കാര്യം ഉറപ്പിച്ചു: കൃഷ്‌ണപിള്ള ഇപ്പോൾ കോൺഗ്രസല്ല; കമ്യൂണിസ്റ്റാണ്‌.

1940 ഡിസംബർ ഒമ്പതിനാണ്‌ പി കൃഷ്‌ണപിള്ളയെ വൈക്കത്ത്‌ പൊലീസ്‌ അറസ്‌റ്റുചെയ്യുന്നത്‌. മലബാറിലെ നേതാവായതിനാലും അവിടെ ഭരണം ബ്രിട്ടീഷുകാരായതിനാലുമാണ്‌ വിവരം അവരെ അറിയിച്ചത്‌.

മറുപടിയായി മലബാർ ജില്ലാ പൊലീസ് സൂപ്രണ്ട് തിരുവിതാംകൂർ ഐജിക്ക് 1940 ഡിസംബർ 16‐ന്‌ അയച്ച കത്തിൽ ഇങ്ങനെ വായിക്കാം:

പി കൃഷ്‌ണപിള്ളയെ അറസ്റ്റ്‌ ചെയ്‌ത വിവരം മലബാർ എസ്‌പിയെ അറിയിച്ചുകൊണ്ടുള്ള കോട്ടയം എസ്‌പിയുടെ കത്ത്‌

''1939 മുതൽ ഇദ്ദേഹത്തെപ്പറ്റി വിവരങ്ങൾ ഉണ്ടായിരുന്നില്ല. മലബാറിലും സമീപ ജില്ലകളിലും കൊച്ചിയിലും തിരുവിതാംകൂറിലും ഒളിവിലിരുന്ന് കമ്യൂണിസ്റ്റ് പ്രവർത്തനങ്ങളിൽ ഏർപ്പെടുകയായിരുന്നു. വേഷം മാറി സഞ്ചരിക്കുന്നതായാണ് അറിവ്.

കമ്യൂണിസ്റ്റ് സാഹിത്യം എത്തിക്കുന്നതിന്റെയും അത് വിതരണം ചെയ്യുന്നതിന്റെയും ഉത്തരവാദിത്വം ഉള്ളതായി കരുതപ്പെടുന്നു.’’ 1940 ജൂണിൽ കൃഷ്‌ണപിള്ളക്കെതിരെ മദ്രാസ് ഗവൺമെന്റ്‌ അറസ്റ്റ്‌ വാറൻഡ്‌ ഇറക്കിയിട്ടുണ്ടെന്ന് എസ് പി വിശദീകരിക്കുന്നു. വൈക്കത്ത് അറസ്റ്റിലായപ്പോൾ സഹോദരനെ കാണാൻ വന്നതാണ് എന്നു പറയുന്നുണ്ടെങ്കിലും, ആലപ്പുഴയിൽ തൊഴിലാളി സഖാക്കളെ കാണാൻ പോകുന്ന വഴിയാകാനാണ് സാധ്യത എന്നും കത്തിലുണ്ട്‌.

പി കൃഷ്‌ണപിള്ള

പിന്നീടാണ് കൃഷ്‌ണപിള്ളയുടെ രാഷ്‌ട്രീയ നിലപാടിൽ മാറ്റം വന്നതിന്റെ സൂചന അദ്ദേഹത്തിന്റെ വസ്‌ത്രധാരണത്തിൽ നിന്നും എസ് പി ‘പിടിച്ചെടുക്കുന്നത്‌.’ അതിങ്ങനെ: അറസ്റ്റിലാകുമ്പോൾ ഖദർ അല്ല കൃഷ്‌ണപിള്ള ധരിച്ചിരുന്നത്. സ്വദേശിയോ വിദേശിയോ ആയ വസ്‌ത്രങ്ങളാണ്.

അതിൽനിന്ന് വ്യക്തമാകുന്ന കാര്യം, അദ്ദേഹം ഇപ്പോൾ കോൺഗ്രസ് അല്ല, കമ്യൂണിസ്റ്റ് ആണെന്നതാണ്. 1930 മുതൽ 1939 വരെ അദ്ദേഹം ഖാദി മാത്രമേ ധരിച്ചിരുന്നുള്ളൂ. (ഈ നിഗമനം വസ്‌തുതാപരമായിരുന്നു. 1940 ജനുവരി 26‐ന്‌ കേരളത്തിലെ കമ്യൂണിസ്റ്റ്‌ പാർടി രൂപീകരണം പരസ്യമാക്കിയിരുന്നു. പാർടി ഒളിവിലായതിനാൽ രഹസ്യമായി ഒട്ടിച്ച പോസ്റ്ററുകളിലൂടെയും ചുവരെഴുത്തിലൂടെയുമായിരുന്നു ഈ പ്രഖ്യാപനം.)

കൃഷ്‌ണപിള്ളയിൽ നിന്നു പിടിച്ചെടുത്ത സാധനങ്ങളുടെ പട്ടിക വൈക്കം പൊലീസിന്റെ റിപ്പോർട്ടിലുണ്ട്‌. 12 രൂപയും കാലണ, അരചക്രം, കാൽചക്രം നാണയങ്ങളും ബസ്‌ ടിക്കറ്റുകളും മൂന്നു കവറും പോക്കറ്റിലുണ്ടായിരുന്നു. കയ്യിൽ വെസ്റ്റെൻഡിന്റെ വാച്ച്‌. ഒരു ബാഗിൽ ഒരു മുണ്ടും രണ്ടു തോർത്തും ഒരു ബെഡ്‌ഷീറ്റും. പിന്നെ ഒരു ലക്‌സ്‌ സോപ്പ്‌, ചെറിയ കത്രിക, ബ്ലേഡ്‌, പെൻസിൽ, നോട്ടുബുക്ക്‌ എന്നിവയും ‘തൊണ്ടി പട്ടിക’യിലുണ്ട്‌.

പി കൃഷ്‌ണപിള്ളയുടെ അറസ്റ്റ്‌ സംബന്ധിച്ച്‌ മലബാർ എസ് പി തിരുവിതാംകൂർ ഐജിക്ക്‌ അയച്ച കത്ത്‌

തിരുവിതാംകൂർ സുരക്ഷാനിയമപ്രകാരം കൃഷ്‌ണപിള്ളയെ ജയിലിലാക്കാനും മലബാർ എസ് പി നിർദേശിക്കുന്നു. ഇത്രയുംകൂടി പറയുന്നുണ്ട്: ‘വിട്ടയച്ചാൽ ഇദ്ദേഹം ഒളിവിൽ വീണ്ടും പ്രവർത്തനം തുടരുമെന്ന്‌ ഉറപ്പാണ്.’ ഈ കത്തിനെ തുടർന്ന് സി പി രാമസ്വാമി അയ്യരുടെ പൊലീസ് കൃഷ്‌ണപിള്ളയെ തിരുവനന്തപുരം സെൻട്രൽ ജയിലിൽ അടച്ചു. അറസ്റ്റ്‌ ചെയ്‌ത വാർത്ത പത്രങ്ങളിൽ 1940 ഡിസംബർ 11‐ന് തന്നെ വന്നു. എന്നാൽ പിന്നീട് അദ്ദേഹത്തെക്കുറിച്ച് ഒരു വിവരവും ഗവൺമെന്റ്‌ പുറത്തുവിട്ടില്ല. ഏത് ജയിലിലാണെന്ന് പോലും അറിയിച്ചില്ല.

ഇത് വ്യാപക പ്രതിഷേധത്തിനിടയാക്കി. പലയിടത്തും പ്രകടനങ്ങളും യോഗങ്ങളും നടന്നു. സഖാവിനെ കൊലപ്പെടുത്തിയോ എന്ന് പോലും സംശയങ്ങൾ ഉയർന്നു. 1941 മാർച്ച് എട്ടിന് മാതൃഭൂമി ‘കൃഷ്‌ണപിള്ള എവിടെ’ എന്ന മുഖപ്രസംഗം പ്രസിദ്ധീകരിച്ചു.

തിരുവനന്തപുരം സെൻട്രൽ ജയിലിലും കൃഷ്‌ണപിള്ള പോരാട്ടം തുടർന്നു. ജയിൽ മർദനത്തിനെതിരെ പ്രതിഷേധം സംഘടിപ്പിച്ചതിന് പിന്നീട് കൃഷ്‌ണപിള്ളയെ ശുചീന്ദ്രത്തെ എടലാക്കുടി ജയിലിലേക്ക് മാറ്റി. ഇതിനിടെ രണ്ടാം ലോകയുദ്ധത്തിൽ സോവിയറ്റ്‌ യൂണിയൻ പങ്കാളിയായതോടെ കമ്യൂണിസ്റ്റ് പാർടി യുദ്ധത്തെ ജനകീയ യുദ്ധമായി വിലയിരുത്തി.

യുദ്ധം വിജയിപ്പിക്കാനുള്ള പരിശ്രമങ്ങൾക്ക്‌ തയ്യാറായി. ഇതേതുടർന്ന്‌ നേതാക്കളെ വിട്ടപ്പോൾ, 1942 മാർച്ച് 21‐ന് കൃഷ്‌ണപിള്ളയെയും മോചിപ്പിച്ചു. എങ്കിലും മലബാറിൽ പ്രവേശിക്കാൻ വിലക്കുണ്ടായിരുന്നു. 1942 ജൂലൈ 22‐ന്‌ പാർടിയുടെ നിരോധനം പിൻവലിച്ചപ്പോഴാണ് ആ വിലക്ക് നീക്കിയത്. സഖാവ്‌ വീണ്ടും പാർടിയുടെ നേതൃത്വം ഏറ്റെടുത്തു .

(കത്തുകൾ നാഷണൽ

ആർക്കൈവ്‌സിൽ നിന്ന്‌)

ദേശാഭിമാനി വാരികയിൽ നിന്ന്