യു എസ് ചാറ്റ് ​ഗ്രൂപ്പിൽ മാധ്യമപ്രവർത്തകനും: ഹൂതികൾക്കെതിരായ ആക്രമണ പദ്ധതികൾ ചോർന്നു; ​ഗുരുതര വീഴ്ച

വാഷിം​ഗ്ടൺ: യെമനിലെ ഹൂതികളെ ആക്രമിക്കാൻ അമേരിക്ക നടത്തിയ മിലിറ്ററി നീക്കങ്ങൾ മാധ്യമപ്രവർത്തകന് ചോർന്ന് കിട്ടിയതായി റിപ്പോർട്ട്. 'ദ അറ്റ്ലാന്റിക് ' എന്ന മ‍ാധ്യമത്തിന്റെ എഡിറ്റർ ഇൻ ചീഫിനാണ് ഇറാനെ പിന്തുണക്കുന്ന ഹൂതികൾക്കെതിരായ ആക്രമണത്തെ സംബന്ധിച്ച വാർത്ത ചോർന്ന് കിട്ടിയത്.

അമേരിക്കൻ ഭരണകൂടത്തിലെ ഉന്നതവൃത്തങ്ങൾ ആശയ വിനിമയം നടത്തുന്ന സിഗ്നൽ എന്ന പ്ലാറ്റ്ഫോമിൽ പങ്കുവെച്ച വിവരങ്ങളാണ് ദ അറ്റ്ലാന്റിക്ക് ലെ മാധ്യമപ്രവർത്തകൻ ജെഫ്രി ​ഗോൾഡ്ബെർ​ഗിന് ലഭിച്ചത്. യുഎസ് മിലിറ്ററി ഓപ്പറേഷന്റെ നിർണായക വിവരങ്ങളാണ് ജെഫ്രിക്ക് ലഭിച്ചത്.

അമേരിക്ക ഹൂതികളെ ആക്രമിക്കുന്നതിന് തൊട്ടുമുന്നെയാണ് ജെഫ്രിയെ സി​ഗ്നൽ ​ചാറ്റ് ​ഗ്രൂപ്പിൽ ഉൾപ്പെടുത്തിയതെന്ന് അമേരിക്കൻ ന്യൂസ് ഏജൻസിയായ റോയിട്ടേഴ്സ് വിശദീകരിക്കുന്നു.

യുഎസ് ഉപരാഷ്ട്രപതി ജെ ഡി വാൻസ്, വിദേശകാര്യ സെക്രട്ടറി മാർക്കോ റൂബിയോ, ദേശീയ സുരക്ഷ ഉപദേഷ്ടാവ് മെെക് വാൾട്സ്, പ്രതിരോധ സെക്രട്ടറി പീറ്റ് ഹെ​ഗ്സെത്ത് തുടങ്ങി, ട്രംപ് ഭരണകൂടത്തിലെ ഏറ്റവും മുതിർന്ന ഉദ്യോ​ഗസ്ഥരടങ്ങിയ ​ഗ്രൂപ്പിലേക്കാണ് ജെഫ്രിയെ ചേർത്തത്.ഇതാണ് ട്രംപ് ഭരണകൂടത്തെ വെട്ടിലാക്കിയിരിക്കുന്നത്. 3500 വാക്കുള്ള ലേഖനത്തിലൂടെ ജെഫ്രി തന്നെ ഇക്കാര്യം വെളിപ്പെടുത്തുകയായിരുന്നു

അതേസമയം, സംഭവത്തെ ശക്തമായ ഭാഷയിൽ വിമർശിച്ച് ഡെമോക്രാറ്റുകൾ രം​ഗത്തെത്തി. ഇത് ദേശീയ സുരക്ഷയുടെ ലം‌​ഘനമാണെന്നും നിയമവിരുദ്ധ പ്രവർത്തി സംബന്ധിച്ച് കോൺ​ഗ്രസ് ശക്തമായ അന്വേഷണം നടത്തണമന്നും ഡെമോക്രാറ്റുകൾ ആവശ്യമുന്നയിച്ചു.

'ഹൂതി പി സി സ്മോൾ ​ഗ്രീപ്പ്' എന്ന തികച്ചും, സ്വകാര്യമായ ​ഗ്രൂപ്പിലേക്ക് അപ്രതീക്ഷിതമായി മാർച്ച് 13ന് തന്നെ ക്ഷണിക്കുകയായിരുന്നു. തിങ്കളാഴ്ച ​ജെഫ്രി പുറത്തുവിട്ട റിപ്പോർട്ടിൽ വ്യക്തമാക്കി.

സുരക്ഷ ഉപദേഷ്ടാവായ മെെക്കൾ വാൾട്സ് തന്റെ ഡെപ്യൂട്ടിയായ അലക്സ് വോം​ഗിനോട് ഹൂതികളെ ആക്രമിക്കാൻ ടെെ​ഗർ ടീമിനെ ഒരുക്കിയിട്ടുണ്ടെന്നും ഉത്തരവാദിത്തം ഏൽപ്പിക്കുന്നുവെന്നത് അടക്കമുള്ള വിവരങ്ങളാണ് മാധ്യമപ്രവർത്തകന് ചോർന്നുകിട്ടിയത്. പ്രശ്നം യുഎസ് സർക്കാരിനെ ​ഗുരുതര പ്രതിസന്ധിയിലാണെത്തിച്ചിരിക്കുന്നത്. ഡെമോക്രാറ്റുകളും ശക്തമായ വിമർശനമാണ് വിഷയത്തിൽ ഉന്നയിക്കുന്നത്.

അതേസമയം, യുഎസ് പ്രസിഡന്റ് ഡൊണാൾഡ് ട്രംപ് വിഷയത്തിൽ കെെമലർത്തുകയായിരുന്നു. തനിക്ക് ഇതിനെ കുറിച്ചറിയില്ലെന്നും ദ അറ്റ്ലാന്റികിന്റെ ആരാധകനല്ല താനെന്നും ട്രംപ് പറഞ്ഞു