ഇറാനിലെ ഇസ്രയേൽ കടന്നാക്രമണം: ആണവ കേന്ദ്രങ്ങൾ ആക്രമിക്കപ്പെടുന്നത് ​ഗുരുതര പ്രത്യാഘാതങ്ങളുണ്ടാക്കും- ഐഎഇഎ

വിയന്ന : ഇറാനെതിരെ ഇസ്രയേൽ നടത്തിയ ആക്രമണത്തിൽ പ്രതികരണവുമായി യുഎൻ മേൽനോട്ടത്തിലുള്ള അന്താരാഷ്ട്ര അറ്റോമിക് എനർജി ഏജൻസി(ഐഎഇഎ). ഇറാനിലെ ആണവ കേന്ദ്രങ്ങൾക്ക് നേരെയടക്കം ഇസ്രയേൽ ആരംഭിച്ച സൈനിക നടപടിയെക്കുറിച്ച് വിലയിരുത്തുകയാണ്. ആണവ കേന്ദ്രങ്ങളുടെ നിലവിലെ സ്ഥിതി ഉറപ്പാക്കുന്നതിനും ആണവ സുരക്ഷയിലുണ്ടാകുന്ന പ്രത്യാഘാതങ്ങൾ വിലയിരുത്തുന്നതിനുമായി നിലവിൽ ഇറാനിയൻ ആണവ സുരക്ഷാ അധികാരികളുമായി ബന്ധപ്പെട്ടുകൊണ്ടിരിക്കുകയാണ്. നതാൻസ് കേന്ദ്രത്തെ ബാധിച്ചിട്ടുണ്ടെന്നും ഉയർന്ന റേഡിയേഷൻ അളവ് ഇല്ലെന്നും ഇറാനിയൻ അധികാരികൾ സ്ഥിരീകരിച്ചിട്ടുണ്ട്. എസ്ഫഹാൻ, ഫോർഡോ ആണവ കേന്ദ്രങ്ങളെ ബാധിച്ചിട്ടില്ലെന്നും അവർ റിപ്പോർട്ട് ചെയ്തിട്ടുണ്ട്.

ഈ സംഭവവികാസങ്ങൾ ഏറെ ആശങ്കാജനകമാണ്. ഏത് സാഹചര്യത്തിലായാലും ആണവ കേന്ദ്രങ്ങൾ ഒരിക്കലും ആക്രമിക്കപ്പെടരുത്. അത് ജനങ്ങൾക്കും പരിസ്ഥിതിക്കും ഒരുപോലെ ദോഷമുണ്ടാക്കുന്നു. അത്തരം ആക്രമണങ്ങൾ ആണവ സുരക്ഷയ്ക്കും, അന്തർദേശീയ സമാധാനത്തിനും ഗുരുതരമായ പ്രത്യാഘാതങ്ങൾ ഉണ്ടാക്കും.

ആണവ കേന്ദ്രങ്ങൾക്കെതിരായ സൈനിക ആക്രമണങ്ങൾ, സമാധാനപരമായ ആവശ്യങ്ങൾക്കായുള്ള ആണവ സൗകര്യങ്ങൾക്കെതിരായ ഏതൊരു സായുധ ആക്രമണവും ഭീഷണിയും ഐക്യരാഷ്ട്രസഭയുടെ ചാർട്ടറിന്റെയും അന്താരാഷ്ട്ര നിയമത്തിന്റെയും ഏജൻസിയുടെ ചട്ടത്തിന്റെയും തത്വങ്ങളുടെ ലംഘനമാണ്. കൂടാതെ ആണവ കേന്ദ്രങ്ങൾക്കെതിരായ സായുധ ആക്രമണങ്ങൾ, ആക്രമിക്കപ്പെട്ട ഇടത്തിന്റെ അതിർത്തിക്കുള്ളിലും പുറത്തും ഗുരുതരമായ പ്രത്യാഘാതങ്ങൾ ഉണ്ടാക്കുന്ന റേഡിയോ ആക്ടീവ് വികിരണങ്ങളുണ്ടാകുന്നതിന് കാരണമാകുമെന്നും ഐഎഇഎ പറഞ്ഞു.

സാഹചര്യം കൂടുതൽ വഷളാകുന്നത് ഒഴിവാക്കാൻ പരമാവധി സംയമനം പാലിക്കാൻ എല്ലാ കക്ഷികളോടും അഭ്യർത്ഥിക്കുന്നതായി ഐഎഇഎ വ്യക്തമാക്കി. ആണവ സൗകര്യങ്ങളുടെ സുരക്ഷയും ഭദ്രതയും അപകടത്തിലാക്കുന്ന ഏതൊരു സൈനിക നടപടിയും ഇറാനിലെയും ചുറ്റുമുള്ള രാജ്യങ്ങളിലെയും ജനങ്ങൾക്ക് ഗുരുതരമായ പ്രത്യാഘാതങ്ങൾ ഉണ്ടാക്കും. ഇറാന്റെ സുരക്ഷാ ബാധ്യതകളെക്കുറിച്ചുള്ള സുപ്രധാന പ്രമേയം ഇന്നലെ ഗവർണേഴ്‌സ് ബോർഡ് അംഗീകരിച്ചിരുന്നു.

സ്ഥിതിഗതികൾ സൂക്ഷ്മമായി നിരീക്ഷിക്കുന്നത് തുടരുകയും സാങ്കേതിക സഹായം നൽകാൻ തയ്യാറാവുകയും ചെയ്യുമെന്ന് ഐഎഇഎ പറഞ്ഞു. ആണവ സൗകര്യങ്ങളുടെ സംരക്ഷണവും ഏജൻസിയുടെ ഉത്തരവിന് അനുസൃതമായി ആണവ സാങ്കേതികവിദ്യയുടെ തുടർച്ചയായ സമാധാനപരമായ ഉപയോഗവും ഉറപ്പാക്കാൻ എല്ലാ പ്രസക്ത കക്ഷികളുമായും ചർച്ചയ്ക്ക് തയ്യാറാണ്. ആണവ കേന്ദ്രങ്ങൾ പൂർണ്ണമായി സംരക്ഷിക്കപ്പെടുന്നുണ്ടെന്നും സമാധാനപരമായ ആവശ്യങ്ങൾക്ക് മാത്രമായി അവ തുടർന്നും ഉപയോഗിക്കുന്നുണ്ടെന്നും ഉറപ്പാക്കാൻ ആവശ്യമായ ഇടങ്ങളിലെല്ലാം ഏജൻസി ആണവ സുരക്ഷാ, സുരക്ഷാ വിദഗ്ധരെ (ഇറാനിലെ സുരക്ഷാ ഇൻസ്പെക്ടർമാർക്ക് പുറമേ) വിന്യസിക്കുന്നത് തുടരും.

ഇറാനിലെയും ഇസ്രായേലിലെയും സുരക്ഷാ ജിവനക്കാരുമായും ഏജൻസി ബന്ധപ്പെട്ടിട്ടുണ്ട്. ജീവനക്കാരുടെ സുരക്ഷ പരമപ്രധാനമാണെന്നും അവരുടെ സുരക്ഷ ഉറപ്പാക്കാൻ ആവശ്യമായ എല്ലാ നടപടികളും സ്വീകരിച്ചിട്ടുണ്ടെന്നും ഏജൻസി വ്യക്തമാക്കി. ആണവോർജത്തിന്റെ സമാധാനപരമായ ഉപയോഗത്തിന് മേൽനോട്ടം വഹിക്കുന്ന അന്താരാഷ്ട്ര സാങ്കേതിക സ്ഥാപനമെന്ന നിലയിൽ, അന്താരാഷ്ട്ര ആണവോർജ ഏജൻസി ചർച്ചകൾക്കുള്ള വേദിയായി തുടരും.

വസ്തുതകൾക്ക് മുൻഗണന നൽകുന്നതിനും സംഘർഷം വർദ്ധിപ്പിക്കാതെ കൃത്യമായ ഇടപെടൽ നടത്തുന്നതിനും ഐഎഇഎ പരിശ്രമിക്കുകയാണ്. ഇറാനിലെ ആണവ സംബന്ധിയായ പ്രശ്‌നങ്ങളുടെ സുതാര്യത, സുരക്ഷ എന്നിവയ്ക്കായുള്ള ശ്രമങ്ങളെ പിന്തുണയ്ക്കുമെന്നും സാങ്കേതിക ചർച്ചകൾ സുഗമമാക്കുന്നതിന് പൂർണ സന്നദ്ധത പ്രകടിപ്പിക്കുമെന്നും ഏജൻസി വ്യക്തമാക്കി.