കോട്ടയിൽ വീണ്ടും വിദ്യാർഥി മരണം: പരീക്ഷയ്ക്ക് മണിക്കൂറുകൾ മുമ്പ് വിദ്യാർഥി ആത്മഹത്യ ചെയ്തു

ജയ്പൂർ : രാജസ്ഥാനിലെ കോച്ചിങ് ഹബ്ബായ കോട്ടയിൽ വീണ്ടും വിദ്യാർഥി ആത്മഹത്യ. നീറ്റ് പരീക്ഷയ്ക്ക് മണിക്കൂറുകൾ മുമ്പ് വിദ്യാർഥി ആത്മഹത്യ ചെയ്തു. മധ്യപ്രദേശ് സ്വ​ദേശിയായ 17കാരിയാണ് ഞായറാഴ്ച നടക്കുന്ന നീറ്റ് പരീക്ഷയ്ക്ക് മണിക്കൂറുകൾ മുമ്പ് ആത്മഹത്യ ചെയ്തത്. ശനിയാഴ്ച രാത്രിയാണ് സംഭവം. കോട്ടയിലെ വീട്ടിലെ മുറിയിൽ വിദ്യാർഥിയെ തൂങ്ങിയ നിലയിൽ കണ്ടെത്തുകയായിരുന്നു. ആശുപത്രിയിലെത്തിച്ചപ്പോഴേക്കും മരിച്ചിരുന്നു. മാതാപിതാക്കൾ‌ക്കൊപ്പം കോട്ടയിലെ പാർശവ്നാഥ് ഏരിയയിലാണ് പെൺകുട്ടി താമസിച്ചിരുന്നത്. നീറ്റ് - യുജിക്കായി തയാറെടുക്കുകയായിരുന്നു വിദ്യാർഥി. സ്കാർഫ് ഉപയോ​ഗിച്ച് മുറിയിലെ ഇരുമ്പ് ​ഗ്രില്ലിൽ തൂങ്ങിയ നിലയിലാണ് പെൺകുട്ടിയെ വീട്ടുകാർ കണ്ടെത്തുന്നത്. ആത്മഹത്യക്കുറിപ്പൊന്നും കണ്ടെത്തിയിട്ടില്ലെന്ന് പൊലീസ് പറഞ്ഞു.

രാജ്യത്തെ തന്നെ പ്രധാനപ്പെട്ട എൻട്രൻസ് കോച്ചിങ് ഹബ്ബുകളിലൊന്നാണ് രാജസ്ഥാനിലെ കോട്ട. ഇവിടെ വിദ്യാർഥി ആത്മഹത്യകൾ നിരന്തരമായി തുടരുന്നതായി റിപ്പോർട്ടുകൾ പുറത്തുവന്നിരുന്നു. ഈ വർഷം ആദ്യം മുതൽ ഇതുവരെ 14 വിദ്യാർഥികളാണ് കോട്ടിയിൽ ആത്മഹത്യ ചെയ്തത്. കഴിഞ്ഞ വർഷം ഇത് 17 ആയിരുന്നു.