തമിഴ്നാട്ടിലെ കരൂരിൽ വാഹനാപകടം: നാലു മരണം, 15 പേർക്ക് പരിക്ക്

കരൂർ : തമിഴ്നാട്ടിലെ കരൂരിലുണ്ടായ വാഹനാപകടത്തിൽ നാലുപേർ മരിച്ചു. 15 പേർക്ക് പരിക്കേറ്റു. മൂന്ന് വാഹനങ്ങൾ കൂട്ടിയിടിച്ചാണ് അപകടമുണ്ടായത്. ശനി പകലായിരുന്നു സംഭവം. ട്രാക്ടറിലിടിച്ച ഒമ്നി വാൻ റോഡിന്റെ മീഡിയനിൽ ഇടിച്ച ശേഷം എതിർവശത്തുകൂടി പോവുകയായിരുന്ന ടൂറിസ്റ്റ് വാനിലേക്ക് ഇടിച്ചുകയറിയാണ് അപകടമുണ്ടായത്.

നാ​ഗർകോവിലിൽ നിന്ന് ബം​ഗളൂരുവിലേക്ക് പോവുകയായിരുന്നു ഒമ്നി വാൻ. കരൂർ- സേലം റോഡിൽ വച്ചാണ് വാൻ ട്രാക്ടറിലേക്ക് ഇടിച്ചുകയറിയത്. ഇടിയുടെ ആഘാതത്തിൽ മീഡിയനിലേക്ക് തെറിച്ചുപോയ വാൻ തൂത്തുക്കുടിയിൽ നിന്ന് എതിർദിശയിലൂടെ വന്ന ടൂറിസ്റ്റ് വാനുമായി കൂട്ടിയിടിക്കുകയായിരുന്നു.

ഇടിയുടെ ആഘാതത്തിൽ മൂന്ന് വാഹനങ്ങളുടെയും മുൻഭാ​ഗം പൂർണമായി തകർന്നു. ഒമ്നി വാനിന്റെ ഡ്രൈവറും മരണപ്പെട്ടവരിലുണ്ട്. പരിക്കേറ്റവരെ കരൂർ സർക്കാർ ആശുപത്രിയിൽ പ്രവേശിപ്പിച്ചു. പൊലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചിട്ടുണ്ട്. മരിച്ചവരുടെ വിവരങ്ങൾ‌ ലഭ്യമല്ല. മരിച്ചവരിൽ എട്ട് വയസുള്ള കുട്ടിയുമുണ്ടെന്നാണ് വിവരം.