കന്നഡിഗരുടെ വികാരം വ്രണപ്പെടുത്തിയെന്ന് ആരോപണം: ഗായകൻ സോനു നിഗത്തിനെതിരെ എഫ്ഐആർ

ബം​ഗളൂരൂ : കന്ന​ഡി​ഗരുടെ വികാരം വ്രണപ്പെടുത്തിയെന്നാരോപിച്ച് ​ഗായകൻ സോനു നിഗത്തിനെതിരെ എഫ്ഐആർ. ബം​ഗളൂരുവിലെ അവലഹള്ളി പൊലീസ് സ്റ്റേഷനിലാണ് എഫ്ഐആർ രജിസ്റ്റർ ചെയ്തത്. ന​ഗരത്തിൽ അടുത്തിടെ നടന്ന സം​ഗീതപരിപാടിക്കിടെയാണ് ​ഗായകൻ കർണാടക സ്വദേശികളെ അപമാനിച്ചതായി പരാതി ഉയർന്നത്.

കർണാടക രക്ഷണ വേദിക് എന്ന തീവ്ര കന്നട സംഘടനയാണ് പരാതി നൽകിയത്. ​ഗായകൻ അടുത്തിടെ കർണാടകത്തിൽ സം​ഗീത പരിപാടി നടത്തിയിരുന്നു. ഇതിനിടെ കന്നഡ ​ഗാനങ്ങൾ തുടർച്ചയായി പാടാൻ കാണികൾ ആവശ്യപ്പെട്ടതിനെത്തുടർന്നായിരുന്നു നടന്റെ പരാമർശമെന്നാണ് പരാതി. കന്നഡ, കന്നഡ എന്നുതന്നെയാണ് പറയുന്നത്. ഇങ്ങനെയുള്ള പെരുമാറ്റം കൊണ്ടാണ് പഹൽഗാം ഭീകരാക്രമണം ഉണ്ടായത് എന്ന് സോനു നിഗം പറഞ്ഞതായാണ് പരാതി. സോനു നിഗം ​​നടത്തിയ പരാമർശങ്ങൾ കന്നഡ സമൂഹത്തിന്റെ വികാരങ്ങളെ വല്ലാതെ വ്രണപ്പെടുത്തി എന്നും കർണാടകയിലെ വിവിധ വിഭാഗങ്ങൾക്കിടയിൽ അക്രമത്തിന് പ്രേരിപ്പിച്ചുവെന്നുമാണ് പരാതിയിൽ പറയുന്നത്.

സംഭവത്തിന്റെ വീഡിയോ സോഷ്യൽ മീഡിയയിൽ പ്രചരിക്കുന്നുണ്ട്. എന്നാൽ സോനു നി​ഗത്തിനോട് കന്നഡ ​ഗാനം പാടാൻ ആവശ്യപ്പെടുന്നത് പരുഷമായാണെന്നും ഭീഷണിപ്പെടുത്തുന്ന രീതിയിലാണ് കാണികൾ ​ഗായകനോട് സംസാരിച്ചതെന്നും വിമർശനമുയരുന്നുണ്ട്. ബിഎൻഎസ് സെക്ഷൻ 351(2), 352(1), 353 വകുപ്പുകൾ പ്രകാരമാണ് എഫ്ഐആർ.