ഉപരാഷ്ട്രപതി തെരഞ്ഞെടുപ്പ് സെപ്റ്റംബർ 9 ന്

ന്യൂഡൽഹി: ഉപരാഷ്ട്രപതി സ്ഥാനത്തേക്കുള്ള തെരഞ്ഞെടുപ്പ് സെപ്റ്റംബർ 9 ന് നടക്കും. വിജ്ഞാപനം ഓഗസ്റ്റ് 7 ന് പുറപ്പെടുവിക്കും, നാമനിർദ്ദേശ പത്രിക സമർപ്പിക്കാനുള്ള അവസാന തീയതി ഓഗസ്റ്റ് 21 ആയിരിക്കും.

പോളിംഗ് ദിവസമായ സെപ്റ്റംബർ 9 ന് തന്നെ തെരഞ്ഞെടുപ്പിന്റെ ഫലം പ്രഖ്യാപിക്കുമെന്ന് തെരഞ്ഞെടുപ്പ് കമ്മീഷൻ അറിയിച്ചു.

ജൂലൈ 21 ന് ജഗ്ദീപ് ധൻഖർ രാജിവച്ചതിനെത്തുടർന്നാണ് ഉപരാഷ്ട്രപതി തെരഞ്ഞെടുപ്പ് പ്രഖ്യാപിച്ചിട്ടുള്ളത്. 2022 ഓഗസ്റ്റിലാണ് 14-ാമത് ഉപരാഷ്ട്രപതിയായി ധൻഖർ തെരഞ്ഞെടുക്കപ്പെട്ടത്. ഭരണകക്ഷിയായ ഭാരതീയ ജനതാ പാർട്ടി നയിക്കുന്ന നാഷണൽ ഡെമോക്രാറ്റിക് അലയൻസും പ്രതിപക്ഷ ഇന്ത്യാ ബ്ലോക്കും ഇതുവരെ സ്ഥാനാർത്ഥികളെ പ്രഖ്യാപിച്ചിട്ടില്ല.

തെരഞ്ഞെടുപ്പ് വിജ്ഞാപനം - 2025 ഓഗസ്റ്റ് 7 (വ്യാഴം)

നാമനിർദ്ദേശം സമർപ്പിക്കാനുള്ള അവസാന തീയതി- 2025 ഓഗസ്റ്റ് 21 (വ്യാഴം)

സൂക്ഷ്മപരിശോധനയ്ക്കുള്ള തീയതി- 2025 ഓഗസ്റ്റ് 22 (വെള്ളി)

പിൻവലിക്കാനുള്ള അവസാന തീയതി- 2025 ഓഗസ്റ്റ് 25 (തിങ്കൾ)

പോളിംഗ് തീയതി (ആവശ്യമെങ്കിൽ)- 2025 സെപ്റ്റംബർ 9 (ചൊവ്വ)

വോട്ടെണ്ണൽ തീയതി (ആവശ്യമെങ്കിൽ)- 2025 സെപ്റ്റംബർ 9 (ചൊവ്വ)

ഇന്ത്യയിൽ നടന്ന 16 ഉപരാഷ്ട്രപതി തെരഞ്ഞെടുപ്പുകളിൽ നാലെണ്ണം (1952, 1957, 1979, 1987) എതിരില്ലാതെ തിരഞ്ഞെടുക്കപ്പെട്ടവയാണ്.

തെരഞ്ഞെടുപ്പ് എങ്ങിനെ

ഭരണഘടനയുടെ ആർട്ടിക്കിൾ 324 പ്രകാരം ഉപരാഷ്ട്രപതി തെരഞ്ഞെടുപ്പ് നടത്തേണ്ടത് തെരഞ്ഞെടുപ്പ് കമ്മീഷനാണ്. 1974 ലെ രാഷ്ട്രപതി, ഉപരാഷ്ട്രപതി തെരഞ്ഞെടുപ്പ് നിയമങ്ങൾ അനുസരിച്ചാണ് ഈ തെരഞ്ഞെടുപ്പുകൾ നടക്കുന്നത്.

കമ്മീഷൻ തിരഞ്ഞെടുപ്പ് ഷെഡ്യൂൾ പ്രഖ്യാപിച്ചുകഴിഞ്ഞാൽ, പ്രക്രിയ 30 മുതൽ 32 ദിവസത്തിനുള്ളിൽ പൂർത്തിയാക്കണം.

രാജ്യസഭയിലെയും ലോക്സഭയിലെയും തിരഞ്ഞെടുക്കപ്പെട്ടതും നാമനിർദ്ദേശം ചെയ്യപ്പെട്ടതുമായ അംഗങ്ങൾ അടങ്ങുന്ന ഇലക്ടറൽ കോളേജാണ് ഉപരാഷ്ട്രപതിയെ തിരഞ്ഞെടുക്കുന്നത്.

രാഷ്ട്രപതി തിരഞ്ഞെടുപ്പിൽ നിന്ന് വ്യത്യസ്തമായി, സംസ്ഥാന നിയമസഭാംഗങ്ങൾ വോട്ട് ചെയ്യുന്നില്ല.

പാർലമെന്റ് മന്ദിരത്തിൽ രഹസ്യ ബാലറ്റ് വഴിയാണ് വോട്ടെടുപ്പ് നടക്കുന്നത്. എംപിമാർ സ്ഥാനാർത്ഥികളെ അവരുടെ ഇഷ്ടാനുസരണം റാങ്ക് ചെയ്യുന്നു.

നിലവിൽ ഇലക്ടറൽ കോളേജിൽ 12 നാമനിർദ്ദേശം ചെയ്യപ്പെട്ട അംഗങ്ങളും ഉപരിസഭയിലെ തെരഞ്ഞെടുക്കപ്പെട്ട 233 അംഗങ്ങളും 543 ലോക്സഭാ എംപിമാരും ഉൾപ്പെടുന്നു.

രാജ്യസഭാ സെക്രട്ടറി ജനറൽ പ്രമോദ് ചന്ദ്ര മോദിയാണ് തിരഞ്ഞെടുപ്പിനുള്ള റിട്ടേണിംഗ് ഓഫീസർ. രണ്ട് അസിസ്റ്റന്റ് റിട്ടേണിംഗ് ഓഫീസർമാരെയും നിയോഗിച്ചിട്ടുണ്ടെന്ന് പോൾ പാനൽ അറിയിച്ചു.