ഞായറാഴ്ച സംസ്ഥാനത്തെ അഞ്ച്‌ ജില്ലകളിൽ യെല്ലോ അലർട്ട്‌

തിരുവനന്തപുരം: സംസ്ഥാനത്ത്‌ വടക്കൻ ജില്ലകളിൽ വരുംദിവസങ്ങളിൽ മഴ ശക്തമാകും. ഞായറാഴ്ച മലപ്പുറം, കോഴിക്കോട്, വയനാട്, കണ്ണൂർ, കാസർകോട്‌ ജില്ലകളിൽ കേന്ദ്രകാലാവസ്ഥ വകുപ്പ്‌ യെല്ലോ അലർട്ട്‌ പ്രഖ്യാപിച്ചു.

ചൊവ്വാഴ്ച കോഴിക്കോട്, വയനാട്, കണ്ണൂർ, കാസർകോട്‌ ജില്ലകളിൽ ഓറഞ്ച്‌ അലർട്ടാണ്‌. തിങ്കളാഴ്ച എറണാകുളം, ഇടുക്കി, തൃശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർകോട്‌ ജില്ലകളിലും ചൊവ്വാഴ്ച തൃശൂർ, പാലക്കാട്, മലപ്പുറം ജില്ലകളിലും യെല്ലോ അലർട്ടാണ്‌.

ശ്രീലങ്ക, തെക്കൻ അറബികടൽ, കന്യാകുമാരി മേഖലകളുടെ ഭാഗങ്ങളിലായി കാലവർഷം വ്യാപിച്ചിട്ടുണ്ട്‌. അറബിക്കടലിൽ കർണാടക തീരത്തിനുമുകളിൽ ന്യുനമർദ്ദ സാധ്യതയുമുണ്ട്‌.

മധ്യകിഴക്കൻ അറബിക്കടലിൽ കർണാടക തീരത്തിന് മുകളിലായി ബുധനാഴ്ചയോടെ ചക്രവാത ചുഴി രൂപപ്പെട്ട് വ്യഴാഴ്ച ന്യുനമർദ്ദമായി ശക്തി പ്രാപിക്കാനും സാധ്യതയുണ്ടെന്ന്‌ കേന്ദ്രകാലാവസ്ഥാ വകുപ്പ്‌ അറിയിച്ചു. ഏതാനും ദിവസങ്ങൾക്കുള്ളിൽ കാലവർഷം കേരളത്തിൽ പ്രവേശിക്കും. ഇതോടെ മഴ സജീവമാകും.