സമരപോരാളിക്ക് വിടനൽകാൻ ജനലക്ഷങ്ങൾ

തിരുവനന്തപുരം: കേരളത്തിന്റെ വിപ്ലവസൂര്യൻ വി എസ് അച്യുതാനന്ദന് അന്ത്യാഭിവാദ്യം അർപ്പിക്കാൻ ജനലക്ഷങ്ങളുടെ ഒഴുക്ക്. എകെജി പഠന ​ഗവേഷണ കേന്ദ്രത്തിൽ നടക്കുന്ന പൊതുദർശനത്തിലേക്ക് നാടാകെ ഒഴുകി എത്തുകയാണ്. വിവിധ രാഷ്ട്രീയകക്ഷി നേതാക്കളും പ്രവർത്തകരും കേരളത്തിന്റെ സമരപോരാളിക്ക് വിട നൽകാൻ എത്തിച്ചേരുന്നുണ്ട്. തിരുവനന്തപുരം എസ്‍യുടി ആശുപത്രിയിൽ നിന്ന് മുഖ്യമന്ത്രി പിണറായി വിജയൻ, സിപിഐ എം സംസ്ഥാന സെക്രട്ടറി എം വി ​ഗോവിന്ദൻ ഉൾപ്പെടെയുള്ള നേതാക്കൾ മൃതദേഹത്തെ അനു​ഗമിച്ചു.

സിപിഐ എം ജനറൽ സെക്രട്ടറി എം എ ബേബി, ഡോ. ടി എം തോമസ് ഐസക്, പി രാജീവ്, കെ എൻ ബാല​ഗോപാൽ, സി എസ് സുജാത തുടങ്ങിയ നേതാക്കൾ അന്ത്യാഭിവാദ്യം അർപ്പിച്ചു.

എകെജി പഠന ഗവേഷണകേന്ദ്രത്തിലെ പൊതുദര്‍ശനത്തിന് ശേഷം മൃതദേഹം രാത്രി തിരുവനന്തപുരത്തെ വീട്ടിലേക്ക് കൊണ്ടുപോകും. ചൊവ്വ രാവിലെ 9 മണിക്ക് ദർബാർ ഹാളിൽ പൊതുദർശനം. ഉച്ചയ്ക്ക് ശേഷം ആലപ്പുഴയിലേക്ക് പോകും. ബുധൻ രാവിലെ പാർടി ജില്ലാ കമ്മിറ്റി ഓഫീസിൽ പൊതുദർശനം. ഉച്ചയ്ക്ക് ശേഷം ആലപ്പുഴ വലിയ ചുടുകാട്ടിലാണ് സംസ്കാരം.