കണ്ണീർക്കയമായി 
വേലിക്കകം വീട്‌

ആലപ്പുഴ

മുദ്രാവാക്യങ്ങൾ തീർത്ത ഇടിമുഴക്കത്തിന്റെ അകമ്പടിയിൽ വേലിക്കകം വീട്‌ പ്രിയപ്പെട്ടവന്‌ അന്ത്യയാത്ര ചൊല്ലുമ്പോൾ തോരാമഴയായിരുന്നു, പ്രകൃതിയിലും ജനമനസ്സിലും. സഖാവായും സഹോദരനായും അച്ഛനായും വി എസ്​ നിറഞ്ഞുനിന്ന വീട്​ വിടചൊല്ലാൻ മടിച്ചു.

ആ വീട്ടിലേക്ക് ചൊവ്വ രാത്രിമുതൽ ജനപ്രവാഹമായിരുന്നു. ഇതേ വീട്ടിൽ വി എസിനെ​ നേരിട്ട്​ കണ്ടവരും ആവലാതിയും ബുദ്ധിമുട്ടും പങ്കുവച്ചവരും ഓർമകളിൽ വീർപ്പുമുട്ടി. തോരാമഴയറിയാതെ, ഇരുട്ടി വെളുത്തതറിയാതെ മണിക്കൂറുകൾ കാത്തുനിന്ന്‌ അവർ ​ വി എസിനെ ഒരിക്കൽകൂടി കണ്ടു​.

ജാതീയപരിഹാസങ്ങൾക്കെതിരെ വി എസ്‌ ആദ്യപോരാട്ടം നടത്തിയ കളർകോട് എൽപി സ്​കൂളിനുമുന്നിലെ ജനസഞ്ചയത്തിന്റെ അന്ത്യാഭിവാദ്യം ഏറ്റുവാങ്ങി​ ​സിപിഐ എം ജില്ലാ കമ്മിറ്റി ഓഫീസിലേക്ക്‌ വിലാപയാത്ര​. ജനക്കൂട്ടം ഒഴുകിയെത്തിയതോടെ റിക്രിയേഷൻ ഗ്ര‍ൗണ്ടിലേക്ക്​ മൃതദേഹം കൊണ്ടുപോകാൻ ഏറെ വൈകി. പാർടി നേതാക്കൾക്കൊപ്പം മകൻ വി എ അരുൺകുമാറുംചേർന്ന്‌​ മൃതദേഹം തിരികെ വാഹനത്തിലേക്ക് എത്തിച്ചു​. ​അവസാന കാഴ്‌ചയ്‌ക്കെത്തിയ ജനം, പോരാട്ടത്തിനുള്ള ഊർജ്ജമാകും ആ ഓർകളെന്ന പ്രതിജ്ഞ ഉളളിലും ഉറക്കെയും ഉറപ്പിച്ചാവർത്തിച്ചു.