കേരളം, കർണാടക തീരത്ത്‌ ചത്തടിയുന്ന തിമിംഗിലങ്ങളുടെ എണ്ണത്തിൽ 10 മടങ്ങ്‌ വർധന

കൊല്ലം: കേരളം, കർണാടക തീരങ്ങളിൽ ചത്തടിയുന്ന തിമിം​ഗിലങ്ങളുടെ എണ്ണത്തിൽ വൻ വർധന. ചത്തടിയുന്ന തിമിംഗിലങ്ങളുടെ എണ്ണം ഒരു ദശകത്തിനുള്ളിൽ പത്തുമടങ്ങായി വർധിച്ചെന്ന്‌ കേന്ദ്ര സമുദ്രമത്സ്യ ​ഗവേഷണ സ്ഥാപനം നടത്തിയ (സിഎംഎഫ്ആർഐ) പഠനത്തിൽ വ്യക്തമാകുന്നു. 2004-–2013 കാലത്ത്‌ വർഷം 0.3 ശതമാനമായിരുന്നത് 2013–-2023ൽ മൂന്നുശതമാനമായി വർധിച്ചെന്നാണ്‌ കണ്ടെത്തൽ. കഴിഞ്ഞ 30 വർഷത്തിനിടയിലെ ഏറ്റവും ഉയർന്ന നിരക്കാണിത്.

ഇന്ത്യയിലെ സമുദ്രസസ്തനികളുമായി ബന്ധപ്പെട്ട ദേശീയ ​ഗവേഷണ പ്രൊജക്ടിന് കീഴിൽ സീനിയർ സയന്റിസ്റ്റ് ആർ രതീഷ്‌ കുമാർ രവീന്ദ്രന്റെ നേതൃത്വത്തിലായിരുന്നു പഠനം. പഠന റിപ്പോർട്ട്‌ ഗവേഷണ പ്രബന്ധമായ റീജണൽ സ്റ്റഡീസ്‌ ഇൻ മറൈൻ സയൻസ്‌ ജേർണലിൽ പ്രസിദ്ധീകരിച്ചു. കപ്പൽ ​ഗതാ​ഗതവും മീൻപിടിത്തബോട്ടുകളും വർധിച്ചത്‌, പാരിസ്ഥിതിക ​ഘടകങ്ങൾ, ആഴം കുറഞ്ഞ തീരക്കടൽ എന്നിവ തിമിംഗിലങ്ങളുടെ ജീവഹാനിക്ക്‌ ആക്കം കൂട്ടുന്നതായി പഠന റിപ്പോർട്ടിൽ പറയുന്നു. കടലിലെ ശബ്ദമലിനീകരണം, കപ്പൽ അപകടങ്ങൾ, സ്വാഭാവിക ആവാസകേന്ദ്രങ്ങളുടെ തകർച്ച എന്നിവയും തിമിം​ഗിലങ്ങളുടെ നിലനിൽപ്പിന് ഭീഷണിയാകുന്നുണ്ട്‌.

ബ്രൈഡ്സ് ഇനം തിമിം​ഗിലങ്ങളാണ്‌ ചത്തടിയുന്നതിൽ ഏറെയും. 2023ൽ നടത്തിയ സർവേയിൽ ഒമ്പത് തിമിം​ഗിലങ്ങളുടെ ജഡം തീരത്തടിഞ്ഞതായി കണ്ടെത്തി. മൺസൂൺ സീസണിന്റെ അവസാനമായ ആ​ഗസ്ത്– നവംബർ മാസങ്ങളിലാണിത്‌.

കാലവർഷത്തോട്‌ അനുബന്ധിച്ച് ഇന്ത്യയുടെ പടിഞ്ഞാറൻ തീരത്ത്‌ വർധിക്കുന്ന ചാള, അയല, നെത്തോലി എന്നിവയെ ഭക്ഷിക്കാൻ എത്തുന്ന തിമിം​ഗിലങ്ങൾ കരയോടുചേർന്ന ആഴം കുറഞ്ഞ പ്രദേശങ്ങളിൽ കുടുങ്ങി ചാകുന്നതും പതിവാണ്‌. പ്രക്ഷുബ്ധമായ കടലിൽ ദിശയറിയാനുള്ള ശേഷി നഷ്ടപ്പെട്ടും ഇവ തീരത്തെത്തുന്നു.

സമുദ്ര ഉപരിതല താപനില വർധിക്കുന്നതിനാൽ ആവാസവ്യവസ്ഥയിലുണ്ടാകുന്ന തടസ്സങ്ങളും തിമിം​ഗിലങ്ങൾ തീരക്കടലുകളിലേക്ക് ഒഴുകിപ്പോകാൻ ഇടയാക്കുന്നതായും പഠനം ചൂണ്ടിക്കാട്ടുന്നു.

​

വേണം സംരക്ഷണ പദ്ധതി

തിമിംഗിലങ്ങളുടെ വംശനാശത്തിനുതന്നെ കാരണമായേക്കാവുന്ന ​ഗുരുതര സാഹചര്യം ഒഴിവാക്കാൻ ഓരോ പ്രദേശത്തിനും അനുയോജ്യമായ രീതിയിലുള്ള സംരക്ഷണ പദ്ധതി വേണമെന്നും റിപ്പോർട്ട്‌ ചൂണ്ടിക്കാട്ടുന്നു. തത്സമയ മുന്നറിയിപ്പുകളും തിമിം​ഗില സംരക്ഷണ ശൃംഖലകളും ആവശ്യമാണ്‌. മത്സ്യത്തൊഴിലാളികൾക്കും ഉദ്യോ​ഗസ്ഥർക്കും പരിശീലനം, വിവരശേഖരണത്തിന് സിറ്റിസൺ സയൻസ് ശക്തിപ്പെടുത്തൽ എന്നിവയും അനിവാര്യമാണ്‌.