വൃദ്ധയെ കൊലപ്പെടുത്തിയ മകൻ കുറ്റക്കാരൻ; ശിക്ഷ 28ന്​

തലശേരി: അമ്മയെ കഴുത്തു ഞെരിച്ചു കൊലപ്പെടുത്തിയ കേസിൽ മകൻ കുറ്റക്കാരനാണെന്ന്​ തലശേരി അഡീഷണൽ സെഷൻസ് (ഒന്ന്​​) കോടതി ജഡ്ജി ഫിലിപ്പ് തോമസ്​ വിധിച്ചു. ചാവശേരി ഉളിയിൽ വെമ്പടിച്ചാൽ വീട്ടിൽ പാർവതിയമ്മയെ (86) കൊലപ്പെടുത്തിയ കേസിലാണ്​ മകൻ കെ സതീശനെ (49) കുറ്റക്കാരനായി കണ്ടെത്തിയത്​. ശിക്ഷ 28ന് പ്രഖ്യാപിക്കും.

സ്വത്തു വിറ്റുകിട്ടിയ പണം മദ്യപാനിയായ മകൻ ധൂർത്തടിച്ചതിനെ അമ്മ ചോദ്യം ചെയ്തതാണ് നിഷ്​ഠുരമായ കൊലപാതകത്തിന്​ കാരണം. പാർവതിയമ്മയുടെ ഏകമകനാണ് പ്രതി. 2018 മെയ് 13ന് പകൽ 3.30നാണ് കേസിനാസ്പദമായ സംഭവം. ചാവശേരിയിലെ വീട്ടിൽവച്ച്​ പ്രതി അമ്മയെ കട്ടിലിൽ കിടത്തി ദേഹത്തു കയറിയിരുന്ന് കഴുത്തു ഞെരിച്ച് ശ്വാസംമുട്ടിച്ച്​ കൊന്നുവെന്നാണ്​ കേസ്​. വാരിയെല്ലുകൾ ഒടിഞ്ഞിരുന്നു. കൃത്യം നടത്തുമ്പോൾ വീട്ടിൽ മറ്റാരും ഉണ്ടായിരുന്നില്ല. ബന്ധുവും അയൽക്കാരനുമായ വിനീഷിന്റെ പരാതിയിൽ മട്ടന്നൂർ എസ്ഐ ചോടോത്ത് ശിവനാണ്​ കേസെടുത്തത്​.

ഡിവൈഎസ്​പിമാരായിരുന്ന എ വി ജോൺ അന്വേഷണം നടത്തുകയും ജോഷി ജോസ് കുറ്റപത്രം സമർപ്പിക്കുകയുംചെയ്തു. പ്രോസിക്യൂഷൻ 25 സാക്ഷികളെ വിസ്തരിക്കുകയും 34 രേഖകളും 12 തൊണ്ടി മുതലുകളും തെളിവിലേക്ക് ഹാജരാക്കുകയുംചെയ്​തു. പ്രതിയുടെ മകൾ എൻ വി ആര്യ, അയൽക്കാരായ വിജയൻ, രാജീവൻ, പ്രദീപൻ, ഫോറൻസിക് സർജൻ ഡോ ഗോപാലകൃഷ്ണൻ പിള്ള, പൊലിസുകാരായ കെ അനിൽ, കെ വി വിനോദ്, രൂപേഷ്, ഐഡിയ നോഡൽ ഓഫീസർ അഗസ്റ്റിൻ ജോസഫ്, ബിഎസ്എൻഎൽ നോഡൽ ഓഫീസർ കെ എ ഷോബിൻ, വില്ലേജ് ഓഫിസർ മുഹമ്മദ് അഫ്‌സൽ, പി പി ജോസഫ്, എഎസ്ഐ പ്രഭാകരൻ എന്നിവരായിരുന്നു പ്രധാന സാക്ഷികൾ. പ്രോസിക്യൂഷനുവേണ്ടി അഡീഷണൽ പ്രോസിക്യൂട്ടർ ഇ ജയറാം ദാസ് ഹാജരായി.