മണ്ഡല– മകരവിളക്ക് കാലയളവിൽ ശബരിമല ദർശനം നടത്തിയവരുടെ എണ്ണം അരക്കോടി കവിഞ്ഞു

ശബരിമല: മണ്ഡല– മകരവിളക്ക് കാലയളവിൽ ഇതുവരെ ശബരിമല ദർശനം നടത്തിയവരുടെ എണ്ണം അരക്കോടി കവിഞ്ഞു. ബുധനാഴ്ച ഉച്ചവരെ ലഭിച്ച കണക്ക് അനുസരിച്ച് 50,86,667 പേരാണ്‌ ഈ സീസണിൽ ശബരിമലയിൽ ദർശനത്തിന് എത്തിയത്‌. 40,95,566 തീർഥാടകർ മണ്ഡലകാലത്ത് ദർശനത്തിനായി എത്തി. മകരവിളക്ക് ഉത്സവത്തിന് നടതുറന്ന 30 മുതൽ ബുധനാഴ്ച ഉച്ചവരെ 9,91,101 തീർഥാടകരും ദർശനം നടത്തി.
മകരവിളക്കിനായി നടതുറന്ന ശേഷമുള്ള എല്ലാ ദിവസളിലും ലക്ഷത്തിനടുത്ത് തീർഥാടകർ എത്തുന്നുണ്ട്. നാല്‌ ദിവസങ്ങളിൽ തീർഥാടകരുടെ എണ്ണം ലക്ഷവും കവിഞ്ഞു. മകരവിളക്കിന് അഞ്ച്‌ ദിനങ്ങൾ മാത്രം അവശേഷിക്കേ സമാനമായ തിരക്ക് തുടരും എന്നാണ് ദേവസ്വം ബോർഡും പൊലീസും കണക്കുകൂട്ടുന്നത്. ഇതിന്റെ ഭാഗമായി മകരവിളക്ക് ഉത്സവ ദിവസവും അതിന് മുമ്പുള്ള രണ്ട് ദിവസങ്ങളിലും ഹൈക്കോടതിയുടെ നിർദേശപ്രകാരം വെർച്വൽ ക്യൂവിന്റെയും സ്പോട്ട് ബുക്കിങ്ങിന്റെയും എണ്ണത്തിൽ നിയന്ത്രണം വരുത്തിയിട്ടുണ്ട്. മകരവിളക്ക് ദിനത്തിൽ അടക്കം സുഖ ദർശനത്തോടൊപ്പം തീർഥാടകരുടെ സുരക്ഷ കൂടി മുൻനിർത്തി വിവിധ വകുപ്പുകളുടെ നേതൃത്വത്തിൽ മുന്നൊരുക്കങ്ങൾ ധ്രുതഗതിയിൽ പുരോഗമിക്കുകയാണെന്ന് ശബരിമല എഡിഎം അരുൺ എസ് നായർ പറഞ്ഞു.