വിഭജന ഭീകര ​ദിനവും മനോരമയുടെ കാവി ഭക്തിയും

തിരുവനന്തപുരം : 'മതനിരപേക്ഷ മനസ്സിനെ വിഭജിക്കാനാകില്ല' എന്ന മലയാള മനോരമയുടെ എഡിറ്റോറിയൽ തലക്കെട്ട് വായിക്കുമ്പോൾ അന്തസ് തോന്നും. പക്ഷേ ഉള്ളടക്കം വായിക്കുംതോറും മനസിലാകും മനോരമയുടെ കാപട്യം. വിഭജന ഭീകര ദിനമായി ആ​ഗസ്ത് 14 ആചരിക്കണമെന്നത് ആർഎസ്എസിന്റെ ഹിന്ദുത്വ അജണ്ടയാണെന്ന് ഉറപ്പിച്ച് എഴുതാൻ മനോരയ്ക്ക് ഭയമാണ്. ആർഎസ്എസിനോട് മനോരമയ്ക്കുള്ളത് ഭയമാണോ ആരാധനയാണോ എന്നതും അവ്യക്തമാണ്.

വിഭാ​ഗീയത, ഭിന്നിപ്പിക്കൽ എന്നിവ ആർഎസ്എസ് വളരെ ഫലപ്രദമായി വടക്കേന്ത്യയിൽ പയറ്റി തെളിഞ്ഞതാണ്. അമിതമായ ഈ ആത്മവിശ്വാസം വച്ച് ആർഎസ്എസ് പല അടവുകളും കേരളത്തിൽ പയറ്റി നോക്കിയെങ്കിലും പ്രബുദ്ധ കേരളം ഇതെല്ലാം അവ​ഗണിച്ച ചരിത്രമാണ് ഉള്ളത്. ​ ഇപ്പോൾ ഗവർണർ പദവി ഉപയോ​ഗിച്ചാണ് ആർഎസ്എസിന്റെ നയങ്ങൾ നടപ്പിലാക്കാൻ ശ്രമിക്കുന്നത്. ​

ഗവർണർ ആർഎസ്എസിന്റെ ചട്ടുകമായി പ്രവർത്തിക്കുന്ന സന്ദർഭങ്ങൾക്ക് കേരളം സാക്ഷിയായതുമാണ്. സ്വാതന്ത്ര ദിനത്തിന്റെ തലേദിവസം അതായത് ആ​ഗസ്ത് 14 ഇനിമുതൽ വിഭജന ഭീകര ​​ദിനമായി ആചരിക്കണമെന്ന മോദിജിയുടെ ആഹ്വാനം ഹൃദയാവഹിച്ച് നടപ്പാക്കാനൊരുങ്ങുകയാണ് ​ഗവർണർ. അതിനുവേണ്ടി കേരളത്തിലും ഈ ​ദിനം ആചരിക്കാൻ സർവകലാശാലകൾക്ക് ഗവർണർ രാജേന്ദ്ര വിശ്വനാഥ് ആർലേക്കർ കത്തയച്ചിട്ടുമുണ്ട്. അയച്ച ഉത്തരവിൽ സംഘടിപ്പിക്കുന്ന പരിപാടികളുടെ വിശദാംശങ്ങൾ അറിയിക്കാനും ആവശ്യപ്പെടുന്നു. സെമിനാറുകൾ ഒരുക്കി ഭീകരത ചർച്ച ചെയ്യാനും നിർദ്ദേശിക്കുന്നുണ്ട് ​ഗവർണർ.

ഇതുവരെ ​ഗവർണറുടെ ഭരണഘടന വിരുദ്ധപ്രവർത്തനങ്ങൾക്ക് കൂട്ടുനിന്ന കോൺ​ഗ്രസ് പ്രസ്തുത വിഷയത്തിൽ പതിയെ എതിർപ്പ് പ്രകടിപ്പിച്ചു. കേരള മുഖ്യമന്ത്രി പിണറായി വിജയൻ ആർഎസ്എസ് അജണ്ട സർവകലാശലകളിൽ വേണ്ട എന്ന് പ്രസ്താവനയിറക്കിയാണ് പ്രതികരിച്ചത്. ​ഗവർണറുടെ നടപടി കേരളത്തിൽ ചർച്ചാവിഷയമാകുമ്പോൾ 'മതനിരപേക്ഷ മനസ്സിനെ വിഭജിക്കാനാകില്ല' എന്ന തലക്കെട്ടിൽ എഡിറ്റോറിയലെഴുതാൻ കാണിച്ച തന്റേടം പക്ഷെ ഹിന്ദുത്വ ഭീകരതയെ കുറിച്ചൊരക്ഷരം ഉരുവിടാതെയെന്നത് പ്രത്യേകം ശ്രദ്ധിക്കണം.

ഇന്ത്യ എഴുപത്തി അഞ്ചാം സ്വാതന്ത്ര്യദിനം ആഘോഷിക്കുന്ന വേളയിലാണ് പ്രധാനമന്ത്രി നരേന്ദ്ര മോദി 2021ൽ ആ​ഗസ്ത് 14 ഭീകര വിരുദ്ധ ദിനമായി ആചരിക്കണമെന്ന് പ്രഖ്യാപിക്കുന്നത്. ഇക്കാര്യം ഇം​ഗ്ലീഷ് ​ദിനപത്രമായ ദി ഹിന്ദുപോലും നരേന്ദ്ര മോദിയുടെ പേര് പറഞ്ഞ് പരാമർശിക്കുമ്പോൾ മനോരമ എഴുതിയിരിക്കുന്നത് 'ചിലർ' കുറച്ച് വർഷങ്ങളായി ആചരിക്കാൻ ശ്രമിക്കുന്നുണ്ട് എന്നാണ്. മനോരമയ്ക്ക് ആർഎസ്എസിനെതിരെ വാർത്തയെഴുതാൻ ഭയമാണെന്ന് വെളിപ്പെടുത്തുന്നതാണിത്.

നമ്മൾ ​ഗാന്ധിയെ കൊന്നു എന്ന് എഴുതിയ പരിഹാസ്യമായ ചരിത്രം കൂടിയുണ്ട് മനോരയ്ക്ക്. ഹിന്ദുത്വ ഭീകരർ, ഹിന്ദുത്വ വാദികൾ എന്നീ വാക്കുകൾക്ക് മനോരമ പാലിക്കുന്ന മൗനത്തിന് മുന്നിൽ ജനാധിപത്യം തലകുനിച്ചുപോകും. ഛത്തീസ്ഖണ്ഡിൽ മലയാളി കന്യാസ്ത്രീകളെ ബജ്‍രം​ഗ്‍ദൾ മതപരിവർത്തനമാരോപിച്ച് അക്രമിച്ച വാർത്തകളും മനോരമ കൈകാര്യം ചെയ്ത രീതിയും മലയാളി കണ്ടതാണ്. മലയാള മനോരമയുടെ ഇരട്ടതാപ്പും മൃദുഹിന്ദുത്വവും കൂടി ഈ ഘട്ടത്തിൽ നാം കണ്ണ് തുറന്ന് തന്നെ കാണണം.