പരിരക്ഷാ പദ്ധതിയുടെ മറവിലും ലീഗ്​ കോടികൾ തട്ടി ; ‘മാസ്​’ സ്​കീമിൽ സ്വീകരിച്ചത്​ കോടികൾ

എടക്കര (മലപ്പുറം)

മുസ്ലിംലീഗ് മലപ്പുറം ജില്ലാ കമ്മിറ്റി ആരംഭിച്ച സാമൂഹ്യ സുരക്ഷാ പദ്ധതിയുടെ മറവിലും കോടികളുടെ തട്ടിപ്പ്. ലീഗ്​ സംസ്ഥാന വൈസ്​ പ്രസിഡന്റും മലപ്പുറം ജില്ലാ പഞ്ചായത്ത് വൈസ് പ്രസിഡന്റുമായ ഇസ്മായിൽ മൂത്തേടം ജില്ലാ കോ–ഓർഡിനേറ്ററായി 2021 ജൂണിൽ ആരംഭിച്ച മലപ്പുറം അസോസിയേഷൻ ഫോർ സെക്യൂരിറ്റി സ്കീം (മാസ്​) മറവിലാണ്​ കോടികൾ തട്ടിയത്​.

പദ്ധതിയിൽ പണം നിക്ഷേപിച്ചിട്ടും ആനുകൂല്യം ലഭിച്ചില്ലെന്ന്​ കാണിച്ച്​ മുൻ എംഎസ്​എഫ്​ നേതാവ്​ പി എ ഷറഫലി മുഖ്യമന്ത്രി, ഡിജിപി, ജില്ലാ പൊലീസ് മേധാവി എന്നിവർക്ക്​ പരാതി നൽകി. പണം തിരിച്ചുനൽകാൻ നടപടി സ്വീകരിക്കണമെന്നാണ്​ ആവശ്യം. രണ്ടായിരം ര‍ൂപ നൽകി അംഗത്വമെടുക്കുന്ന പദ്ധതി പ്രകാരം, മരണപ്പെട്ടാൽ രണ്ടുലക്ഷവും ഗുരുതര പരിക്കേൽക്കുന്നവർക്ക് ഒരുലക്ഷവും അടിയന്തര ചികിത്സാ സഹായമായി 10,000മുതൽ 50,000വരെയുമാണ്‌ നൽകുന്നതെന്നായിരുന്നു പ്രഖ്യാപനം.

ഓരോവർഷവും സ്​കീം പുതുക്കാൻ 1500 രൂപവീതവും ഇ‍ൗടാക്കി. നിയോജകമണ്ഡലം കമ്മിറ്റികൾക്ക്​ ടാർഗറ്റ് നൽകിയാണ്​ ആളെ ചേർത്തത്​​​. 2023ൽ 25,000 പേർ അംഗങ്ങളായെന്ന്​ പ്രമോഷൻ വീഡിയോയിൽ കോ– ഓർഡിനേറ്റർ അവകാശപ്പെട്ടിരുന്നു. ഈ വർഷംഅഞ്ച്​ കോടി ലഭിച്ചു. ആരംഭവർഷമായ 2021ലും 2022ലും ഇതിലും കൂടുതൽ ലഭിച്ചു.

ഏകദേശം 20 കോടിയാണ്​ ആകെ സ്വര‍ൂപിച്ചത്​. ലഭിച്ച തുകയെല്ലാം​ കോ–ഓർഡിനേറ്ററുടെ നിയന്ത്രണമുള്ള മൂത്തേടം സഹകരണ ബാങ്കിലാണ്​ നിക്ഷേപിച്ചത്​. എന്നാൽ, അംഗത്വമെടുത്ത്​ പണമടച്ചവർക്ക്‌ നാല് വർഷമായിട്ടും ആനുകൂല്യം ലഭിച്ചില്ല.

നിലവിലെ മഞ്ചേരി എംഎൽഎ യു എ ലത്തീഫ് ലീഗ് ജില്ലാ ജനറൽ സെക്രട്ടറിയായിരിക്കെയാണ് പദ്ധതി ആരംഭിച്ചത്. എന്നാൽ, അബ്ദുൾ ഹമീദ് ജനറൽ സെക്രട്ടറിയായതോടെ പദ്ധതിയിൽ സുതാര്യതയില്ലെന്നുകണ്ട് അവസാനിപ്പിച്ചു. നിക്ഷേപത്തുക വകമാറ്റിയാണ്​ കോടികൾ തട്ടിയത്. പദ്ധതിയിൽ ലഭിച്ച തുക ചെലവഴിച്ചത്​ ഇതുവരെ വെളിപ്പെടുത്തിയിട്ടില്ല. ലീഗ് നേതാവിന് വിവിധ സഹകരണ ബാങ്കുകളിലുള്ള വായ്​പാ കുടിശ്ശികയിലേക്ക്​ കോടികൾ വകമാറ്റിയതായി ആക്ഷേപമുണ്ട്​.