മുണ്ടക്കൈ ദുരന്തബാധിതരുടെ വായ്‌പ എഴുതിത്തള്ളൽ: എന്താണ്‌ തടസ്സമെന്ന്‌ കേന്ദ്രത്തോട്‌ ഹൈക്കോടതി

കൊച്ചി : മുണ്ടക്കൈ-, ചൂരൽമല ഉരുൾപൊട്ടൽ ദുരന്തബാധിതരുടെ വായ്‌പ എഴുതിത്തള്ളുന്നതിൽ ഒരാഴ്ചയ്‌ക്കകം തീരുമാനം അറിയിക്കാൻ കേന്ദ്ര സർക്കാരിനോട് ഹൈക്കോടതി. അതിതീവ്രദുരന്തമായി പ്രഖ്യാപിച്ചതിനാൽ വായ്‌പ എഴുതിത്തള്ളുന്നതിൽ നടപടിയെടുക്കാൻ എന്താണ്‌ തടസമെന്നും കോടതി ആരാഞ്ഞു. ദുരന്തത്തിന്റെ പശ്ചാത്തലത്തിൽ സ്വമേധയാ സ്വീകരിച്ച ഹർജിയാണ് ജസ്‌റ്റിസ് എ കെ ജയശങ്കരൻ നമ്പ്യാർ, ജസ്‌റ്റിസ് എസ് ഈശ്വരൻ എന്നിവരടങ്ങിയ ഡിവിഷൻ ബെഞ്ച് പരിഗണിച്ചത്.

ദുരന്തബാധിതരുടെ വ്യക്തി​ഗത, വാഹന, ഭവന വായ്‌പകൾ എഴുതിത്തള്ളാൻ കഴിയുമോയെന്ന് കേന്ദ്ര സർക്കാരിനോടും ദേശീയ ദുരന്തനിവാരണ അതോറിറ്റിയോടും കഴിഞ്ഞ സെപ്തംബറിൽ ഹൈക്കോടതി ചോദിച്ചിരുന്നു. എന്നിട്ടും നടപടിയുണ്ടായില്ല. ഇക്കാര്യത്തിൽ കേന്ദ്ര സർക്കാർ ഇതുവരെ തീരുമാനമെടുത്തിട്ടില്ലെന്ന് സംസ്ഥാന സർക്കാരും അമിക്കസ്‌ക്യൂറിയും അറിയിച്ചു. ഹർജി ഏഴിന്‌ വീണ്ടും പരിഗണിക്കും.