കാലാവസ്ഥ നിർണായകം, 
എൽസ ദ‍ൗത്യം നാളെ ആരംഭിച്ചേക്കും

കൊച്ചി

കേരളതീരത്തെ പുറംകടലിൽ മുങ്ങിയ ലൈബീരിയൻ ചരക്കുകപ്പൽ എംഎസ്‌സി എൽസ 3ലെ ഇന്ധനനീക്കത്തിന്​ പ്രാരംഭ പ്രവൃത്തികൾ വ്യാഴാഴ്​ച ആരംഭിച്ചേക്കുമെന്ന്​ സൂചന. കപ്പൽ മുങ്ങി രണ്ടര മാസത്തിനുശേഷമാണ്​ ദ‍ൗത്യം ആരംഭിക്കുന്നത്​.

ഇന്ധന നീക്കം ആഗസ്​ത്​ ഒന്നിന്​​ ആരംഭിക്കണമെന്ന്​ ഡയറക്ടറേറ്റ്​ ജനറൽ ഓഫ്​ ഷിപ്പിങ്​ കപ്പൽ ഉടമകളോട്​​ നിർദേശിച്ചിരുന്നു​​. എന്നാൽ, കടൽ പ്രക്ഷുബ്​ധമായതിനാൽ മുങ്ങൽവിദഗ്​ധർ അടങ്ങുന്ന സാൽവേജ്​ സംഘത്തിന്​ സംഭവസ്ഥലത്ത്​ എത്താനായിട്ടില്ല. മെയ് 25നാണ്​ കപ്പൽ മുങ്ങിയത്​. 450 ടൺ ഇന്ധനമാണ്​ കപ്പലിന്റെ ടാങ്കുകളിലുള്ളത്​. മുങ്ങിയ സ്ഥലത്ത്‌ എണ്ണപ്പാട കണ്ടെത്താൻ കനറ മേഘ കപ്പൽ 24 മണിക്കൂർ നിരീക്ഷണം നടത്തുന്നുണ്ട്‌.

സതേൺ നോവ എന്ന ലൈബീരിയൻ കപ്പലിന്റെയും കനറ മേഘയുടെയും സഹായത്തോടെയായിരിക്കും ഇന്ധന നീക്കം. സതേൺ നോവ നിലവിൽ കൊല്ലം തുറമുഖത്തിനുസമീപം പുറങ്കടലിൽ നങ്കൂരമിട്ടിട്ടുണ്ട്​. കാലാവസ്ഥ അനുകൂ‍ലമാണെങ്കിൽ ബുധനാഴ്​ച കൊല്ലം തുറമുഖത്തെത്തും. തുടർന്ന്​ വ്യാഴാഴ്​ചയോടെ കപ്പൽ മുങ്ങിയ സ്ഥലത്ത്​ എത്തി ഇന്ധന നീക്കം ആരംഭിക്കുമെന്നും സൂചനയുണ്ട്​.

കപ്പലിന്റെ ടാങ്കുകളിൽനിന്ന്​ ഇന്ധനം നീക്കിയശേഷം കണ്ടെയ്നറുകൾ നീക്കും. മുംബൈ ആസ്ഥാനമായ മെർക്ക് എന്ന സാൽവേജ് ഓപ്പറേഷൻ കമ്പനിയുടെ നേതൃത്വത്തിലാണ് ദൗത്യം പുനരാരംഭിക്കുന്നത്. ടാങ്കിൽ ചോർച്ച വരാതെ ദ്വാരമിടുന്ന പ്രത്യേക ഉപകരണം സ്ഥാപിച്ച്​ ഇവയിൽ അനുബന്ധ ഉപകരണങ്ങൾ ഘടിപ്പിച്ചാണ് ഇന്ധനം പൈപ്പ് വഴി മുകളിലേക്ക് പമ്പ് ചെയ്ത് ടാങ്കിലേക്ക് മാറ്റുക. ഇ‍ൗ പ്രവൃത്തിമാത്രം ഒരാഴ്ച നീളും.