എൽസ കപ്പൽ മുങ്ങിയ സ്ഥലത്ത്​ വീണ്ടും കണ്ടെയ്​നർ

കൊച്ചി

ലൈബീരിയൻ ചരക്കുകപ്പൽ എംഎസ്‌സി എൽസ 3 മുങ്ങിയ സ്ഥലത്ത്​ വീണ്ടും ഒരു കണ്ടെയ്​നർ പൊങ്ങി. വ്യാഴാഴ്ച വൈകിട്ട്​​ കായംകുളത്തിനുസമീപമാണ്​ കടലിൽ കണ്ടെയ്​നർ കണ്ടെത്തിയത്​. അടിഭാഗം തുറന്ന നിലയിലാണെന്നും കണ്ടെയ്​നർ കാലിയാണെന്നും മുങ്ങൽവിദഗ്​ധർ നടത്തിയ പരിശോധനയിൽ വ്യക്തമായി.

കപ്പൽ മുങ്ങിയ സ്ഥലത്ത്‌ നിരീക്ഷണം നടത്തുന്ന കനറ മേഘ കപ്പലിന്റെ സഹായത്തോടെ കണ്ടെയ്​നർ കൊല്ലം തുറമുഖത്തെത്തിച്ചു. സംസ്ഥാന ദുരന്തനിവാരണ അതോറിറ്റി വിവരങ്ങൾ​ ശേഖരിച്ചു​. കണ്ടെയ്​നറിനുള്ളിൽ നിറച്ചിരുന്നത്​ "മോപ്​ലെൻ' ബ്രാൻഡിൽ അറിയപ്പെടുന്ന പോളി പ്രൊപ്പിലീൻ എന്ന രാസവസ്​തുവാണെന്ന് കാർഗോ ലിസ്റ്റ്​ പരിശോധിച്ചതിൽനിന്ന് കണ്ടെത്തി. അതേസമയം, കപ്പലിലെ ഇന്ധനം നീക്കുന്നതിനുള്ള​ പ്രാരംഭപ്രവൃത്തികൾ ആരംഭിക്കാനായിട്ടില്ല. 60 പേരടങ്ങുന്ന വിദഗ്​ധസംഘം ഇതിനായി തയ്യാറായി കൊല്ലം തുറമുഖത്തുണ്ട്​.

സതേൺ നോവ എന്ന ലൈബീരിയൻ കപ്പൽ, ഓഫ്​ഷോർ മൊണാർക്ക്​, കനറ മേഘ എന്നീ കപ്പലുകളുടെ സഹായത്തോടെയായിരിക്കും പ്രവൃത്തികൾ. ഇന്ധനം നീക്കൽ ഒന്നിന്​​ ആരംഭിക്കണമെന്ന്​ ഡയറക്ടറേറ്റ്​ ജനറൽ ഓഫ്​ ഷിപ്പിങ്​ കപ്പൽ ഉടമകളോട്​​ നിർദേശിച്ചിരുന്നു​​. എന്നാൽ, കടൽ പ്രക്ഷുബ്​ധമായതിനാൽ മുങ്ങൽവിദഗ്​ധർ അടങ്ങുന്ന സാൽവേജ്​ സംഘത്തിന്​ സംഭവസ്ഥലത്ത്​ എത്താനായിട്ടില്ല. മെയ് 25നാണ്​ കപ്പൽ മുങ്ങിയത്​. 450 ടൺ ഇന്ധനമാണ്​ ടാങ്കുകളിലുള്ളത്​.