ട്രൈബൽ മന്ത്രി ഉന്നതകുലജാതനാകണം: സുരേഷ് ​ഗോപിയുടെ പരാമർശം ഭരണഘടനാ ലംഘനം- കെ രാധാകൃഷ്ണൻ

ന്യൂഡൽഹി : ട്രൈബൽ വിഭാ​ഗത്തിന്റെ മന്ത്രി ഉന്നതകുല ജാതനാകണമെന്ന കേന്ദ്രമന്ത്രി സുരേഷ് ​ഗോപിയുടെ പരാമർശം ഭരണഘടനാ ലംഘനമാണെന്ന് കെ രാധാകൃഷ്ണൻ എംപി. ഭരണഘടന തൊട്ട് സത്യം ചെയ്തിട്ടാണ് സുരേഷ് ​ഗോപി അധികാരത്തിലിരിക്കുന്നത്. ഇന്ത്യൻ ഭരണഘടന എല്ലാ മനുഷ്യർക്കും തുല്യതയാണ് വാ​ഗ്ദാനം ചെയ്യുന്നത്. ഇതിനെതിരായാണ് സുരേഷ് ​ഗോപിയുടെ പരാമർശമെന്നും കെ രാധാകൃഷ്ണൻ എംപി പറഞ്ഞു. ഇന്ത്യയുടെ രാഷ്ട്രപതി സ്ഥാനത്തിരിക്കുന്ന വ്യക്തിയെപ്പോലും അപമാനിക്കുന്ന തരത്തിലാണ് സുരേഷ് ​ഗോപിയുടെ വാക്കുകൾ. അദ്ദേഹം പറഞ്ഞത് തെറ്റാണ്. ആരാണ് ഉന്നതകുലജാതൻ എന്ന് സുരേഷ് ​ഗോപിയാണോ നിശ്ചയിക്കുന്നത്. എപ്പോഴും ഇങ്ങനെ സംസാരിക്കുന്നതാണ് സുരേഷ് ​ഗോപിയുടെ രീതി.

കേരളത്തിന് അർഹതപ്പെട്ടത് വേണമെന്ന് പറയുമ്പോൾ അതിനൊപ്പം നിൽക്കാതെ കേരളത്തെ തകർക്കാനാണ് സുരേഷ് ​ഗോപി ശ്രമിക്കുന്നത്. ഉന്നതകുലജാതൻ എന്ന് കരുതുന്ന സുരേഷ് ​ഗോപിയുടെ മനസിൽ നിന്ന് വരുന്ന കമന്റാണ് കേരളത്തിനെതിരെയുള്ളത്. കേന്ദ്രത്തിന്റെ സാമ്പത്തിക സർവേ റിപ്പോർട്ടിൽ എല്ലാ മേഖലകളിലും കേരളം മുന്നേറി എന്ന് പറയുന്നുണ്ട്. അങ്ങനെയുള്ള കേരളത്തെ എങ്ങനെ തകർക്കാമെന്നാണ് ബിജെപി സർക്കാർ ആലോചിക്കുന്നത്. ആ സമീപനമാണ് ബജറ്റിലും കാണുന്നത്.

എല്ലാവരും അടിമകളായിരിക്കണം, ഞങ്ങളാണ് വലുത് എന്നുള്ള ചില ഉന്നതകുലജാതൻമാരുടെ ധാരണയാണ് കുറേ കാലങ്ങളായി സുരേഷ് ​ഗോപി പറഞ്ഞുവച്ചുകൊണ്ടിരിക്കുന്നത്. കേന്ദ്രമന്ത്രിയാണെന്നത് മറന്നുകൊണ്ടാണ് സുരേഷ് ​ഗോപി സംസാരിക്കുന്നത്. ജാതി ചിന്തയുടെ അവശിഷ്ടങ്ങൾ ഇപ്പോഴും സമൂഹത്തിൽ നിൽക്കുന്നുണ്ട്. ഉന്നതരും താഴ്ന്നവരും എന്ന സങ്കൽപ്പമാണ് ഇന്ത്യയുടെ ശാപം. അത് തുടരുകയാണ്. ഭരണഘടന തൊട്ട് സത്യം ചെയ്ത മന്ത്രിയുടെ ഭാ​ഗത്ത് നിന്ന് തന്നെ ഇത്തരം പരാമർശങ്ങൾ ഉണ്ടാകുന്നത് അപമാനകരമാണ്. ആ സ്ഥാനത്തിരിക്കാൻ സുരേഷ് ​ഗോപി യോ​ഗ്യനല്ല എന്ന് തെളിയിച്ചുകൊണ്ടിരിക്കുകയാണെന്നും കെ രാധാകൃഷ്ണൻ പറഞ്ഞു.