മഹിളാ കോൺ​ഗ്രസ് മണ്ഡലം സെക്രട്ടറി എസ്ഡിപിഐയിൽ ചേർന്നു

പെരുമ്പാവൂർ: തദ്ദേശ തെരഞ്ഞെടുപ്പിൽ സീറ്റ് ലഭിക്കാത്തതിനെ തുടർന്ന് മഹിളാ കോൺ​ഗ്രസ് മണ്ഡലം സെക്രട്ടറി രാജിവെച്ച് എസ്ഡിപിഐയിൽ ചേർന്നു. സ്വാതന്ത്ര്യസമരസേനാനിയും കോൺ​ഗ്രസ് നേതാവുമായിരുന്ന പി പി കമാലിന്റെ മകൾ സുലേഖാ കമാലാണ് കോൺ​ഗ്രസ് വിട്ടത്.

പെരുമ്പാവൂർ മുനിസിപ്പാലിറ്റിയിലെ 26-ാം വാർഡിൽ സുലേഖ യുഡിഎഫ് സ്ഥാനാർഥിയാകുമെന്നാണ് ആദ്യം നേതാക്കള്‍ പ്രചരിപ്പിച്ചത്. തുടർന്ന് വീടുകൾ കയറി സുലേഖ പ്രചാരണം ആരംഭിക്കുകയും ചെയ്തിരുന്നു. എന്നാൽ പിന്നീട് സുലേഖയെ ഒഴിവാക്കി കോൺ​ഗ്രസ് മറ്റൊരാളെ സ്ഥാനാർഥിയാക്കി. ഇതിനുപിന്നാലെയാണ് മകനൊപ്പം സുലേഖ എസ്ഡിപിഐയിൽ ചേർന്നത്. രാഹുൽ ​ഗാന്ധിയുടെ ജോഡോ യാത്രയിൽ ഉൾപ്പെടെ സുലേഖ പങ്കെടുത്തിട്ടുണ്ട്. മകൻ സഫീർ കോൺ​ഗ്രസ് ബ്ലോക്ക് ജനറൽ സെക്രട്ടറിയാണ്.

കോൺ​ഗ്രസ് നേതൃത്വം ഈ വിഷയത്തിൽ ഇതുവരെ പ്രതികരിച്ചിട്ടില്ല.